क्रेडिट कार्डाचे बिल न भरल्याने शिवीगाळ

भिवंडी, ता. २४ (वार्ताहर) : काल्हेर गावात क्रेडिट कार्ड वसुलीच्या नावाखाली सुनेला व तिच्या सासूला अश्लील शिवीगाळ करून विनयभंग केल्याची धक्कादायक घटना उघडकीस आली आहे. पीडित विवाहितेच्या तक्रारीवरून संबंधित वसुलीदाराविरोधात नारपोली पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पीडितेच्या सासऱ्याने काही काळापूर्वी क्रेडिट कार्ड घेतले होते. त्याचे बिल न भरल्याने वसुलीदाराने २१ नोव्हेंबरला दुपारी पावणेबारा वाजता सुनेला फोन केला. बिल भरण्याची सूचना देताना त्याने सुनेलाच नव्हे तर सासूलाही अश्लील भाषेत शिवीगाळ केली. यामुळे पीडितेचा मनस्ताप झाला असून, तिने तत्काळ पोलिसांकडे धाव घेत तक्रार नोंदवली. पीडितेच्या फिर्यादीवरून वसुलीदाराविरोधात विनयभंगासह विविध गंभीर गुन्ह्यांमध्ये कलमे दाखल करण्यात आली आहेत. पुढील तपास नारपोली पोलिसांकडून सुरू आहे.