विद्यार्थ्यांना ‘स्त्री सुरक्षा व उपाययोजना’वर मार्गदर्शन

मुरबाड, ता. २४ (बातमीदार) : शांतारामभाऊ घोलप व गोटीरामभाऊ महाविद्यालय, शिवळे येथे सोमवारी (ता. २४) ‘लिंगभाव, लैंगिक छळ व उपाययोजना’ या विषयावर मार्गदर्शन शिबिर घेण्यात आले. महिला विकास कक्ष व अंतर्गत तक्रार निवारण कक्ष यांच्या संयुक्त विद्यमाने हा उपक्रम राबविण्यात आला. या वेळी योगिता देसले यांनी सादर केलेल्या ‘ईश्वर वंदने’ने वातावरण भक्तिमय झाले.
कार्यक्रमाचे प्रास्ताविक महिला विकास कक्ष प्रमुख व उपप्राचार्या डॉ. गीता विशे यांनी केले. प्रमुख मार्गदर्शक ॲड. रेखा चिरनेरकर (कल्याण) यांनी विद्यार्थ्यांशी संवाद साधत ‘लिंगभाव व लैंगिक अत्याचार’ या विषयातील मूलभूत फरक स्पष्ट केला. समाजात वाढत्या लैंगिक अत्याचाराच्या घटना, त्याची कारणे आणि त्याचे गंभीर परिणाम यावर त्यांनी सविस्तर चर्चा केली. प्रत्यक्ष उदाहरणांद्वारे लैंगिक अत्याचाराचे मानसिक, सामाजिक व कायदेशीर दुष्परिणाम विद्यार्थ्यांसमोर मांडले. कार्यक्रमाच्या अध्यक्षस्थानी महाविद्यालयाचे प्राचार्य डॉ. एम. ए. बडगुजर होते. विद्यार्थ्यांना मार्गदर्शन करताना त्यांनी आपली व समाजाची सुरक्षितता ही प्रत्येकाची सामूहिक जबाबदारी आहे, असे सांगून सजगतेचे महत्त्व अधोरेखित केले. सूत्रसंचालन स्नेहा तारे यांनी केले, तर आभार प्रा. प्रिया भगत यांनी मानले. कार्यक्रम यशस्वी करण्यासाठी डॉ. मीना सुतवणी व राजश्री घुडे यांनी विशेष परिश्रम घेतले.