डहाणूत राजकीय वातावरण तापले

डहाणूत राजकीय वातावरण तापले
कासा, ता. २५ (बातमीदार) : डहाणू नगर परिषद निवडणुकीचा प्रचार आता जोरात रंगला आहे. उमेदवारांच्या प्रचारमोहिमा, चौक सभा, रॅली, घर-घर भेटी आणि रात्रीच्या मुक्त बैठका यामुळे तालुक्यातील राजकीय वातावरण तापले आहे. मतदारांना आपल्या बाजूला खेचण्यासाठी प्रत्येक पक्षाकडून जोरदार मोर्चेबांधणी सुरू आहे.
उपमुख्यमंत्री एकनाथ शिंदे यांनी अलीकडेच शिवसेना (शिंदे गट), राष्ट्रवादी काँग्रेस (शरद पवार गट) आणि राष्ट्रवादी काँग्रेस (अजित पवार गट) या पक्षांच्या उमेदवारांच्या समर्थनार्थ जाहीर सभा घेत भाजपला थेट आव्हान दिले होते. या सभेनंतर राजकीय वातावरण आणखी तापले आहे.
याला प्रत्युत्तर म्हणून आता मुख्यमंत्री देवेंद्र फडणवीस बुधवारी (ता. २६) डहाणूत येणार असल्याने भाजप कार्यकर्त्यांकडून जय्यत तयारी सुरू आहे. निवडणुकीत अवघे काहीच दिवस शिल्लक असताना दोन्ही आघाड्यांचा जोरदार प्रचार पाहायला मिळत असून डहाणूतील राजकीय वातावरण रंगतदार बनले आहे.