पोलिसांकडून ‘ओरी’ची सहा तास चौकशी

पोलिसांकडून ओरीची सहा तास चौकशी

घाटकोपर, ता. २६ (बातमीदार) : दुबई अमली पदार्थ पार्टी प्रकरणात मुंबई पोलिसांनी बुधवारी समाजमाध्यम प्रभावक ओरी याची सुमारे सहा तासांहून अधिक काळ चौकशी केली. ओरी हा त्याचे वकील व बॉडीगार्ड यांच्यासोबत दुपारी सुमारे १ वाजता घाटकोपर येथील अँटिनार्कोटिक्स सेल कार्यालयात पोहोचला होता.
पोलिस सूत्रांकडून मिळालेल्या माहितीनुसार, ओरी याचा संबंध थेट दाऊदचा भाचा अली शाह पारकर याच्याशी असल्याचा संशय आहे. पोलिसांनी हे लक्षात घेत ओरी याची चौकशी सुरू केली. ही चौकशी सलीम सोहेल शेख याच्या जबाबावरून करण्यात आली. पोलिसांनी अलीकडेच सलीम सोहेल शेख याला दुबईहून ताब्यात घेत भारतात आणले आहे. तो २०२२मध्ये सांगली जिल्ह्यात पकडलेल्या एका मोठ्या अमली पदार्थ तस्करी प्रकरणातील फरारी आरोपी होता.