राणीच्या बागेत पहिल्यांदाच कला प्रदर्शनाचे आयोजन

राणीच्या बागेत पहिल्यांदाच कला प्रदर्शनाचे आयोजन
निसर्गसौंदर्याचे अभ्यासक, कलाकारांना संधी
कांदिवली, ता. २७ (बातमीदार) ः भायखळा येथील वीरमाता जिजाबाई भोसले वनस्पती उद्यान आणि प्राणिसंग्रहालयात बोन्साय आणि ओरिगामी कला प्रदर्शनाचे आयोजन करण्यात आले आहे. बृहन्मुंबई महापालिका वृक्ष प्राधिकरण आणि मुंबईतील जपानचे महावाणिज्य दूतावास यांच्या संयुक्त विद्यमाने २८ ते ३० नोव्हेंबरदरम्यान हे प्रदर्शन होणार आहे.
मुंबईकरांसाठी हे प्रदर्शन म्हणजे निसर्ग आणि कलेचा एकत्र उत्सव ठरणार आहे. प्रवेश सर्वांसाठी विनामूल्य आहे. या सुवर्णसंधीचा लाभ घ्यावा, असे आवाहन पालिकेचे उद्यान अधीक्षक जितेंद्र परदेशी यांनी केले आहे. पालिका आयुक्त तथा प्रशासक भूषण गगराणी, अतिरिक्त पालिका आयुक्त (पूर्व उपनगरे) डॉ. अमित सैनी, उपआयुक्त (उद्याने) अजितकुमार आंबी यांच्या मार्गदर्शनाखाली हे प्रदर्शन भरविण्यात येत आहे. ‘बोन्साय’ या लघुवृक्ष संवर्धन कलेसोबतच ‘ओरिगामी’ म्हणजेच कागदाच्या घड्या घालून नवनवीन कलाकृती साकारण्याची पारंपरिक जपानी कला या प्रदर्शनात अनुभवता येणार आहे.