गायमुख घाटावर मल्टी एक्सेल कंटेनर उलट

कंटेनर उलटल्याने वाहतूक कोंडी
घोडबंदर वाहिनी गायमुख घाटातील प्रकार
ठाणे, ता. २७ (बातमीदार) : घोडबंदर वाहिनी गायमुख घाटाच्या वळणावर दुपारी एक मल्टिएक्सेल कंटेनर तिरपा होऊन बंद पडला. त्यामुळे या मार्गावर पुन्हा एकदा वाहतूक कोंडी झाली. कंटेनर काढण्यासाठी आलेले हायड्रा मशीनसुद्धा उलटल्याने या मार्गावरील कोंडी सायंकाळी उशिरापर्यंत होती. मिरा-भाईंदर महापालिकेच्या हद्दीत घोडबंदर वाहिनीवर रस्त्याच्या दुरुस्तीचे काम सुरू असल्याने या मार्गावर धीम्या गतीने वाहनांची वाहतूक सुरू आहे. त्यातच कंटेनर आणि हायड्रा मशीन उलटल्याने झालेली कोंडी नियंत्रणात आणण्याकरिता वाहतूक विभागाला प्रचंड त्रासाचा सामना करावा लागला.
घोडबंदर मार्गावरील गायमुख घाटावर खड्ड्यांचे साम्राज्य आहे. जड-अवजड वाहनांना यातून मार्ग काढण्यासाठी प्रचंड सावधानता बाळगावी लागते. शिवाय हा घाट तीव्र उतार आणि चढणीचा असल्याने दररोज एक तरी अवजड वाहने बंद पडते. गुरुवारी (ता. २७) या घटनेची पुनरावृत्ती झाली. दुपारी मल्टिएक्सेल कंटेनर तिरपा होऊन बंद पडला. कंटेनर तिरपा झाल्यामुळे घोडबंदर वाहिनीवर संपूर्ण वाहतूक बंद झाली. कंटेनर बाजूला करण्याकरिता हायड्रा मशीन मागवण्यात आले. मात्र हे मशीनसुद्धा कंटेनर उचलत असताना पलटी झाले. पलटी झालेले मशीन सरळ करण्याकरिता आणखीन एक हायड्रा मशीन आणावे लागले.