गोरेगावात एसआरए इमारतीला आग

गोरेगावात एसआरए इमारतीला आग

मालाड, ता. २८ (बातमीदार) ः गोरेगाव पश्चिम येथील गावदेवी उत्कर्ष एसआरए गृहनिर्माण सोसायटीमध्ये शुक्रवारी (ता. २८) सकाळी विजेच्या बॉक्सला भीषण आग लागली. ही सोसायटी बांगूरनगर मेट्रो स्थानकाच्या अगदी शेजारी असल्याने परिसरातही काहीकाळ भीतीचे वातावरण निर्माण झाले. ही घटना सकाळी सुमारे ६.३० वाजता घडली.
विजेचा बॉक्स अचानक पेटल्याने आग जलदगतीने पसरू लागली. धूर आणि ज्वाळा वाढू लागल्याने रहिवासी घाबरून घराबाहेर पडले. याबाबत माहिती मिळताच अग्निशमन दल घटनास्थळी दाखल झाले; मात्र इमारतीसमोर जागा नसल्याने अग्निशमन दलाला रस्ता मोकळा करण्यासाठी अनेक दुकानांची शटर तोडावी लागली. त्यामुळे आग विझविण्यास विलंब झाला. अखेर सकाळी ७.३० वाजता आग नियंत्रणात आणली; मात्र तोवर मोठे आर्थिक नुकसान झाले होते. यात कोणतीही जीवितहानी झालेली नाही.