शाळेला बॉम्बने उडविण्याची धमकी

शाळेला बॉम्बने उडविण्याची धमकी
भाईंदर, ता. १ (बातमीदार) : काशी मिरा येथील एका नामांकित शाळेला सोमवारी (ता. १) सकाळी सहा वाजता एका अज्ञात व्यक्तीकडून बॉम्बने उडवण्याची धमकी देणारा ईमेल पाठवण्यात आला. शाळा प्रशासनाकडून त्याची माहिती तत्काळ पोलिसांना देण्यात आली. पोलिसांनी तातडीने शाळेच्या संपूर्ण परिसरात बंदोबस्त ठेवला आणि बॉम्बशोध पथक व श्वानपथकासह शाळेची कसून तपासणी सुरू करण्यात आली. परिसरात यामुळे तणाव निर्माण झाला होता. दुपारी शोध घेतल्यानंतरही पोलिसांना काहीही सापडले नाही. धमकीचा ईमेल कोणी आणि कुठून पाठवला, याबाबत पोलिसांनी तपास सुरू केला आहे.