एचआयव्हीवरील जनजागृतीसाठी ‘मशाल’ उपक्रम

एचआयव्हीवरील जनजागृतीसाठी ‘मशाल’ उपक्रम
१५० महाविद्यालयांत मोहीम
सकाळ वृत्तसेवा
मुंबई, ता. २ : जागतिक एड्स दिनानिमित्त एचआयव्हीविषयी जागरूकता वाढवण्यासाठी महापालिकेकडून विशेष ‘जनजागृती मशाल’ उपक्रमाची सुरुवात करण्यात आली. महापालिकेचे उपायुक्त शरद उघडे यांच्या हस्ते ही मशाल महाविद्यालयीन विद्यार्थ्यांना सुपूर्द करण्यात आली. विद्यार्थ्यांकडून विद्यार्थ्यांपर्यंत जनजागृती पोहोचावी, एचआयव्हीबाबतचे गैरसमज, कलंक आणि भेदभाव कमी व्हावा, हा या मोहिमेचा प्रमुख उद्देश आहे.
मुंबईतील १५० पेक्षा अधिक महाविद्यालयांमध्ये ही मशाल नेण्यात येणार असून, प्रत्येक महाविद्यालयातील एनएसएस स्वयंसेवक आणि ‘रेड रिबन क्लब’च्या माध्यमातून एचआयव्हीविषयी माहिती, प्रतिबंध, उपचार, तसेच सामाजिक स्वीकृती या विषयांवर उपक्रम राबवले जातील. मुंबई जिल्हा एड्स नियंत्रण संस्थेच्या सहकार्याने चालणारा हा उपक्रम युवकांमधून युवकांपर्यंत जागरूकतेचा संदेश पोहोचवणारा ठरणार आहे. मशाल प्रतीकात्मक असली तरी अंधारात प्रकाश देण्यासारखे मार्गदर्शन, ऊर्जा आणि एकात्मतेचा संदेश ती देत असल्याचे आयोजकांचे म्हणणे आहे. ‘चलो एकत्र, अडथळे पार करूया आणि विजयरथ पुढे नेऊया’ ही यंदाच्या एचआयव्ही जागतिक दिनाची संकल्पना लक्षात घेऊन हा उपक्रम आखण्यात आला आहे.

तरुणांपर्यंत पोहोचण्याचा प्रयत्‍न
मुंबईतील १५५ महाविद्यालयांशी संस्थेचे आरोग्य-जागृतीसंबंधित कार्य सुरू आहे आणि प्रत्येक महाविद्यालयात स्थापन केलेल्या क्लबच्या माध्यमातून विद्यार्थ्यांमध्ये सातत्याने माहिती, समज आणि सकारात्मक दृष्टिकोन निर्माण करण्याची जबाबदारी पेलली जाते. मशाल मोहिमेमुळे जागरूकतेची ही चळवळ अधिक प्रभावीपणे तरुणांपर्यंत पोहोचेल, अशी अपेक्षा मुंबई जिल्हा एड्स नियंत्रण विभागाचे अतिरिक्त प्रभारी प्रकल्प संचालक डॉ. विजय करंजकर यांनी सांगितले.