मुंबई उत्तर-पश्चिम लोकसभा क्षेत्रात “खासदार क्रीडा महोत्सव– २०२५” अंतर्गत भव्य मॅरेथॉन स्पर्धा

खासदार क्रीडा महोत्सव अंतर्गत भव्य मॅरेथॉन
जोगेश्‍वरी, ता. ३ (बातमीदार) ः सध्याच्या धकाधकीच्या जीवनशैलीत आरोग्याकडे दुर्लक्ष होऊ नये, यासाठी नागरिकांना शारीरिक तंदुरुस्तीबाबत प्रोत्साहन देण्याच्या उद्देशाने उत्तर-पश्चिम लोकसभा क्षेत्रात रविवारी (ता. ७) भव्य मॅरेथॉन स्पर्धेचे आयोजन केले आहे. ही स्पर्धा खासदार रवींद्र वायकर यांच्या पुढाकाराने तसेच पंतप्रधान नरेंद्र मोदी यांच्या मार्गदर्शनातील खासदार क्रीडा महोत्सव उपक्रमाचा एक भाग आहे.
गोरेगाव पूर्व आरे चेक नाका येथून सकाळी ६ वाजता मॅरेथॉनला सुरुवात होणार आहे. स्पर्धेत दोन किलोमीटर, पाच किलोमीटर आणि १० किलोमीटर या तीन गटांचा समावेश आहे. आरे चेक नाका, बिरसा मुंडा चौक, आरे चेक नाका असा या स्पर्धेचा मार्ग निश्चित करण्यात आला आहे.
स्पर्धेत विजेत्यांना रोख रक्कम, प्रमाणपत्र आणि पदक प्रदान केले जाणार आहे. विशेष म्हणजे या उपक्रमात २००० हून अधिक स्पर्धक सहभागी होणार आहेत. प्रत्येक सहभागीला सहभागाचे प्रमाणपत्र व पदक दिले जाणार आहे.