सेंचुरी मिलची सहा एकर जागा लिलावात काढणार, याप्रश्नावर कामगार वर्गात असंतोष

सेंचुरी मिल भूखंड लिलावात?
कामगारवर्गात असंतोष; आंदोलनाचा इशारा
शिवडी, ता. ३ (बातमीदार) : मुंबई महापालिकेने वरळी येथील सेंचुरी मिलचा सहा एकर भूखंड विक्रीसाठी लिलावात काढण्याचा निर्णय घेतल्यामुळे गिरणी कामगार वर्गात तीव्र संतापाची लाट उसळली आहे. लवकरच या भूखंडासाठी निविदा प्रक्रिया राबविण्यात येणार आहे. कामगारांच्या घरांसाठी असलेली मागणी डावलून महापालिका नफ्यासाठी हा भूखंड विकत असल्याबद्दल कामगारवर्गात तीव्र नाराजी पसरली आहे.
सुमारे ४५ ते ५० वर्षांच्या भाडेतत्त्वावरील करार नुकताच संपुष्टात आल्यानंतर महापालिकेने हा भूखंड ताब्यात घेतला आहे आणि आता नव्या धोरणानुसार त्याची विक्री केली जाणार आहे. काही महिन्यांपूर्वी गिरणी कामगार कृती समितीच्या बैठकीत राष्ट्रीय मिल मजूर संघाचे सरचिटणीस गोविंदराव मोहिते यांनी याच भूखंडासह ‘लॅन्ड सिलिंग ॲक्ट’मधील जागा गिरणी कामगारांना घरे देण्यासाठी वापरण्याची मागणी केली होती. विशेष म्हणजे, या मागणीवर मुख्य सचिवांच्या बैठकीत सहमती व्यक्त करण्यात आली होती. असे असतानाही महापालिका हा भूखंड लिलावात काढत असल्याबद्दल कामगार नेते गोविंदराव मोहिते यांनी आश्चर्य व्यक्त केले आहे. त्यांनी या निर्णयामुळे कामगारवर्गात उठाव झाल्याशिवाय राहणार नाही, असा इशारा दिला आहे.