शास्त्रीनगर रुग्णालयातील पाच कर्मचाऱ्यांवर कारवाई
डोंबिवली साप चावून मृत्यू प्रकरण
सकाळ वृत्तसेवा
डोंबिवली, ता. ३ ः शास्त्रीनगर रुग्णालयात सप्टेंबर महिन्यात साप चावल्याने एका चिमुरडीसह तरुणीचा मृत्यू झाल्याची घटना घडली होती. या प्रकरणात रुग्णालय प्रशासनाकडून मोठा हलगर्जीपणा झाल्याची बाब उघडकीस आली. पालिका आयुक्त अभिनव गोयल यांच्या निर्देशानुसार याप्रकरणात स्थापन करण्यात आलेल्या चौकशी समितीने रुग्णालयातील पाच जणांवर हलगर्जीपणाचा ठपका ठेवत कारवाई केली आहे. त्यानुसार दोन कर्मचाऱ्यांना निलंबित तर एकाला कामावर येण्यास प्रतिबंध आणि रुग्णालय प्रमुखांची एक वेतनवाढ रोखण्यात आली आहे.
पालिका प्रशासनाने कारवाई केलेल्या कर्मचाऱ्यांमध्ये वैद्यकीय अधिकारी डॉ. संजय जाधव, परिचारिका प्रमुख शारदा गोडसे यांचा समावेश आहे. कक्ष कामगार आशीष कांबळे यांना कामावर येण्यास प्रतिबंध करण्यात आला आहे. मुख्य वैद्यकीय अधिकारी डॉ. योगेश चौधरी यांच्यावर पर्यवेक्षकीय काम ढिलाईने केल्याचा ठपका ठेवत त्यांची वेतनवाढ रोखली आहे. बाल अतिदक्षता विभाग चालवणाऱ्या अल्पाईन डायग्नोसिस या बाह्यस्त्रोत संस्थेनेही हलगर्जीपणा केल्याचे आढळल्याने त्यांच्या ऑक्टोबर महिन्याच्या देयकातील ५० टक्के रक्कम दंड स्वरूपात कपात करण्याचे आदेश देण्यात आले आहेत.
खंबाळपाडा येथील चिमुरडी प्राणवी भोईर आणि तिची मावशी श्रुती ठाकूर यांना विषारी साप चावल्यानंतर त्यांना उपचारासाठी शास्त्रीनगर रुग्णालयात दाखल केले होते. मात्र, त्यावेळी संबंधित डॉक्टर व कर्मचारी उपस्थित नसल्याचा आरोप चौकशीत सिद्ध झाला. दोघींनाही पुढे ठाणे सामान्य रुग्णालयात हलविण्यात आले, मात्र उपचार सुरू असतानाच त्यांचा मृत्यू झाला. या प्रकाराविरोधात कुटुंबीयांसह विविध राजकीय पक्षांनी आंदोलन करत दोषींवर कठोर कारवाईची मागणी केली होती. प्रदेशाध्यक्ष रवींद्र चव्हाण, दीपेश म्हात्रे, सत्यवान म्हात्रे यांच्यासह विविध नेत्यांनी सखोल चौकशीसाठी पालिकेला निवेदन दिले होते.
नवीन वैद्यकीय अधिकारी नेमण्याच्या हालचाली
अतिरिक्त आयुक्त हर्षल गायकवाड यांच्या मार्गदर्शनाखाली उपायुक्त प्रसाद बोरकर, उपायुक्त वंदना गुळवे आणि वैद्यकीय आरोग्य अधिकारी डॉ. दीपा शुक्ल यांच्या समितीने चौकशी अहवाल सादर केला आहे. रुग्णालयात नवीन मुख्य वैद्यकीय अधिकारी नेमण्याच्या हालचालीही सुरू असून अनुभवी डॉक्टरांना नियुक्त करण्याची मागणी होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.