वसई तहसीलदार कार्यालयात संविधान उद्देशिकेचे उद्घाटन

संविधान उद्देशिका कोनशिलेचे लोकार्पण
बोळिंज, ता. ३ (बातमीदार) : वसई तहसीलदार कार्यालय, वसई पश्चिम येथे आज भारताच्या संविधानाच्या उद्देशिका कोनशिलेचे लोकार्पण आमदार स्नेहा दुबे पंडित यांच्या हस्ते करण्यात आले.
प्रशासकीय क्षेत्रात संविधानातील मूल्यांची अंमलबजावणी अधिक बळकट व्हावी आणि नागरिकांमध्ये जागरूकता वाढावी, या उद्देशाने ही कोनशिला उभारण्यात आली आहे. स्नेहा दुबे यांनी विश्वास व्यक्त केला की, या कोनशिलेमुळे जनजागृतीस मदत मिळेल. या लोकार्पण सोहळ्याला प्रांत अधिकारी शेखर घाडगे, वसईचे प्रभारी तहसीलदार विनोद धोत्रे, नायब तहसीलदार शशिकांत नाचन, रिपाइं जिल्हा अध्यक्ष ईश्वर धुळे यांच्यासह तहसील कार्यालयातील अधिकारी आणि नागरिक मोठ्या संख्येने उपस्थित होते.
यावेळी नागरिकांनी महानगरपालिका मुख्यालयात सुरू असलेले उद्देशिका कोनशिलेचे काम राजकीय मध्यस्थीमुळे तोडण्यात आले होते, ते काम लवकरात लवकर पूर्ण व्हावे, अशी विनंती केली. भाजपने या तोडकामाची चौकशी करण्याची मागणी केली आहे.