कर्जत-नेरळ रेल्वे स्थानकाच्या नामांतरासाठी खासदार सुरेश म्हात्र मैदानात

कर्जत-नेरळ रेल्वे स्थानकाच्या नामांतराची मागणी
चारही सागरी जिल्ह्यातील भूमिपुत्रांची मागणी; शिष्टमंडळाने घेतली खासदारांची भेट
कल्याण, ता. ६ (वार्ताहर) : नवी मुंबई आंतरराष्ट्रीय विमानतळाला लोकनेते दि. बा. पाटील यांचे नाव देण्याच्या निर्णयानंतर, आता कर्जत आणि नेरळ रेल्वे स्थानकांच्या नामांतराचा प्रश्न ऐरणीवर आला आहे. भिवंडी लोकसभेचे खासदार सुरेश म्हात्रे यांनी या मागणीला पाठिंबा दर्शवत, या नामांतरासाठी संसदेत आणि रेल्वे मंत्रालयाकडे पाठपुरावा करण्याचे आश्वासन दिले आहे.
कर्जत रेल्वे स्थानकाला हुतात्मा भाई कोतवाल यांचे नाव, नेरळ रेल्वे स्थानकाला वीर हुतात्मा हिराजी गोमाजी पाटील यांचे नाव देण्याची मागणी करण्यात आली आहे. या मागणीसाठी विविध सामाजिक संघटनांच्या पदाधिकाऱ्यांनी आणि भूमिपुत्रांच्या एका शिष्टमंडळाने नुकतीच सुरेश म्हात्रे यांची भेट घेऊन त्यांना निवेदन दिले.
या शिष्टमंडळात भूमिपुत्र फाउंडेशन अध्यक्ष सुशांत पाटील, आगरी कोळी युथ फाउंडेशन अध्यक्ष निलेश पाटील, आगरी कोळी मेडिकोज उपाध्यक्ष डॉ. तपन पाटील, आगरी ग्रंथालय चळवळ संस्थापक सर्वेश तरे, चुनाभट्टी आगरी विकास मंडळाचे धीरज कालेकर, ज्येष्ठ सामाजिक कार्यकर्ते मच्छिंद्र म्हात्रे आदींचा समावेश होता. शिष्टमंडळाशी चर्चा करताना सुरेश म्हात्रे यांनी हुतात्मा कोतवाल आणि हिराजी गोमाजी पाटील यांचा त्याग आणि बलिदान समाजासाठी प्रेरणादायी आहे. त्यांचा यथोचित गौरव होण्यासाठी रेल्वे स्थानकांना त्यांचे नाव देणे ही काळाची गरज आहे, असे त्यांनी सांगितले. या आश्वासनामुळे भूमिपुत्रांमध्ये आनंदाचे वातावरण असून, लवकरच या मागणीला मूर्त स्वरूप येईल, अशी आशा व्यक्त केली जात आहे.