हर सवाल का जवाब...बाबासाहेब.

हर सवाल का जवाब... बाबासाहब!
डॉ. बाबासाहेब आंबेडकर यांना संगीतमय आदरांजली
धारावी, ता. ४ (प्रतिनिधी) ः डॉ. बाबासाहेब आंबेडकर यांच्या महापरिनिर्वाण दिनानिमित्त ‘हर सवाल का जवाब... बाबासाहब!’ हा संगीतमय आदरांजलीचा कार्यक्रम बुधवारी (ता. ४) दादर-माटुंगा कल्चरल सेंटरमध्ये पार पडला. दोस्त कला मंचतर्फे दरवर्षी हा कार्यक्रम घेतला जातो.
ज्येष्ठ साहित्यिक यशवंत मनोहर यांच्या शब्दात माईसाहेब आंबेडकर यांचे मनोगत, महात्मा फुले, शाहू महाराज यांचे व्यक्तिमत्त्व सादरीकरण, बाबासाहेबांच्या महापरिनिर्वाण दिनाचे चित्रीकरण करणाऱ्या दिवंगत नामदेव व्हटकर यांच्या कुटुंबीय मान्यवरांचा कृतज्ञता सन्मान हे यंदाच्या कार्यक्रमाचे वैशिष्ट्य ठरले. त्याचबरोबर विठ्ठल लाड आणि सहकाऱ्यांचे आदिवासी अस्मिता नृत्य, सुनंदा नेवसे पाटील, चित्रपट दिग्दर्शक महेश बनसोडे, अभिनेत्री दीपाली बडेकर, जयवंत हिरे, छायाताई कोरेगावकर, संदेश शालिनी संभाजी कर्डक, निनाद सिद्धये, बाळासाहेब उमप गजेंद्र मांजरेकर, मंजुषा गोवर्धन पेशवे, आदिती पोपट सातपुते, अनहद संध्या संदेश आदी कार्यकर्त्या कलावंतांनी सादर केलेल्या कविता, गाणी, नाट्यछटा, राकेश सुतारनिर्मित फुले- शाहू- आंबेडकर यांचे चित्रशिल्प अशा बहुविध कला प्रकाराद्वारे बाबासाहेबांना सांगीतिक आदरांजली अर्पण केली गेली.
या कार्यक्रमाची संकल्पना संयोजन रवी भिलाणे यांचे असून भानुदास धुरी, ज्योती बडेकर, अशोक जाधव, राजू शिरधनकर, संदेश गायकवाड, प्रशांत राणे आदींनी या कार्यक्रमाचे संयोजन केले.