अजिवली केंद्राचा राज्यात डंका

अजिवली केंद्राचा राज्यात डंका
सचिवांकडून आरोग्य, पायाभूत सुविधा, रुग्णसेवेचा आढावा
पनवेल, ता. ७ (बातमीदार) ः अजिवलीतील प्राथमिक आरोग्य केंद्राला राज्याचे सार्वजनिक आरोग्य सचिव ई. रवींद्रन यांनी नुकतीच भेट दिली. या वेळी आरोग्य केंद्राची इमारत, चालू सेवा तसेच आरोग्यविषयक विविध कार्यक्रमांची पाहणी केली.
सर्वप्रथम प्राथमिक आरोग्य केंद्राच्या इमारतीची तपासणी करत पायाभूत सोयीसुविधांचा आढावा घेतला. बाह्यरुग्ण विभागात उपस्थित रुग्णांशी सुसंवाद साधत उपलब्ध आरोग्यसेवा, उपचारपद्धती, औषधपुरवठा तसेच आयुष्मान भारत गोल्डन कार्ड योजनेंतर्गत लाभांविषयी विचारणा केली. रुग्णांनी समस्या, अनुभव, मिळणाऱ्या सेवांबद्दल समाधान व्यक्त केले. पाहणीदरम्यान तालुका आरोग्य अधिकारी डॉ. अपर्णा खेडेकर, डॉ. सायली मानकर, डॉ. राज चव्हाण, वैद्यकीय अधिकारी अजिवली, तसेच तालुका आरोग्य अधिकारी केंद्राचे कर्मचारी उपस्थित होते.
-----------------------------------
उपक्रमांचे कौतुक
ठाणे उपसंचालक परिमंडळाचे डॉ. अशोक नांदापूरकर, रायगडचे जिल्हा आरोग्य अधिकारी डॉ. आनंद गोसावी आणि जिल्हा शल्यचिकित्सक अलिबाग डॉ. निशिकांत पाटील आदी उपस्थित होते. आरोग्य केंद्रातील विविध उपक्रमांचे कौतुक करत आवश्यक सुधारणा, सेवा-वृद्धी, जनजागृती कार्यक्रम प्रभावीपणे राबवण्याचे मार्गदर्शन केले. तसेच आरोग्य केंद्राच्या कार्यक्षमतेत आणखी वाढ होण्याची अपेक्षा व्यक्त केली.