गरजू रुग्णांसाठी पाटोळे कुटूंबाकडून औषधदान

गरजू रुग्णांसाठी पाटोळे कुटूंबाकडून औषधदान
माणगाव, ता. ६ (वार्ताहर) : तालुक्यातील पाटोळे परिवाराने पुन्हा एकदा समाजमन जिंकले आहे. गरजू रुग्णांसाठी सदैव तत्पर राहून सेवा देण्याची परंपरा जपणाऱ्या या कुटुंबाने उपजिल्हा रुग्णालय, माणगाव येथे जीवनावश्यक औषधसामुग्रीचा मोठ्या प्रमाणात पुरवठा करून सामाजिक जबाबदारीचे उत्तम उदाहरण घालून दिले.
आपल्या आई-वडिलांच्या वाढदिवसानिमित्त पाटोळे कुटुंबाने एक हजार सलाईन बॉटल्स, ४५० इंजेक्शन्स, २०० आय. व्ही. सेट्स अशा महत्त्वपूर्ण आणि अत्यावश्यक साहित्याचे दान रुग्णालयाला देऊन समाजासाठी नवा आदर्श निर्माण केला. कष्ट, मेहनत, प्रामाणिकपणा आणि चिकाटीच्या आधारावर उभी राहिलेली दशरथ पाटोळे आणि दर्शना पाटोळे ही दांपत्य जोडी, समाजातील मूल्यांचा वारसा आपल्या मुलांना देण्यात यशस्वी ठरली आहे. उच्चशिक्षित आणि सक्षम बनलेल्या दोन्ही मुलांनीही पालकांच्या सामाजिक प्रेरणेला अनुसरून दानधर्माचा मार्ग स्वीकारत वाढदिवसाचे औचित्य खऱ्या अर्थाने सार्थ केले.