दिव्यांगांनी आपली कला सादर करून मिळविली उपस्थितांची शाबासकी

दिव्यांगांच्या कलेला उपस्थितांची शाबासकी
जागतिक दिव्यांग दिनानिमित्त विशेष कार्यक्रम उत्साहात
विरार, ता. ९ (बातमीदार) ः जागतिक दिव्यांग दिनाचे औचित्य साधून वसई-विरार शहर महानगरपालिका मुख्यालयात विशेष कार्यक्रमाचे आयोजन करण्यात आले होते. या कार्यक्रमाला दिव्यांग विद्यार्थी व नागरिकांनी मोठा प्रतिसाद दिला.
दिव्यांग बांधवांनी स्वागत गीत, नृत्य आणि मूकनाट्य यांसारखे विविध सांस्कृतिक कार्यक्रम सादर करून उपस्थितांची भरपूर शाबासकी मिळवली. श्रवणकुमार (दिव्यांग) यांनी गाणी सादर केली. आयुक्त मनोजकुमार सूर्यवंशी, अतिरिक्त आयुक्त दीपक सावंत, उपायुक्त स्वाती देशपांडे, प्र. शहर अभियंता प्रदीप पाचंगे, सहा. आयुक्त नीलाक्षी पाटील, दिव्यांग विभाग समन्वयक रूपाली कदम, विविध दिव्यांग संस्थांचे पदाधिकारी, दिव्यांग शाळांचे शिक्षक, दिव्यांग नागरिक, मनपा अधिकारी व कर्मचारी उपस्थित होते.
आयुक्त मनोजकुमार सूर्यवंशी यांनी मार्गदर्शन करताना सांगितले, की महापालिकेने २४ नोव्हेंबर रोजी आयोजित केलेल्या रोजगार मेळाव्यात अनेक दिव्यांगांना संधी मिळाली. तसेच, पालिका क्षेत्रात दिव्यांग पार्क उभारण्याचा प्रयत्न असल्याचेही त्यांनी नमूद केले. अतिरिक्त आयुक्त दीपक सावंत यांनी प्रास्ताविक सादर केले, तर अनुसया प्रधान यांनी जाणीव-जागृती व्याख्यान दिले. कार्यक्रमाचे निवेदन बिपीन वर्तक (दिव्यांग) यांनी केले. तसेच आभार प्रदर्शन उप आयुक्त स्वाती देशपांडे यांनी मानले.