धूळ नियंत्रणासाठी ९८५ रुपयांचा खर्च

धूळ नियंत्रणासाठी ९८५ रुपयांचा खर्च
पनवेल पालिका क्षेत्रात स्विपिंग यंत्राद्वारे साफसफाई
खारघर, ता. ९ (बातमीदार) : पनवेल महापालिका क्षेत्रात धुळीमुळे प्रदूषणात वाढ होताना दिसत आहे. त्यामुळे पालिका प्रशासनाने प्रतिबंधासाठी दोन स्विपिंग मशीन कार्यरत केल्या असून, रस्ते साफसफाईसाठी पालिका प्रति किलोमीटरसाठी ९८५ खर्च करीत आहे.
पनवेल पालिका हद्दीत मोठ्या प्रमाणात विकासकामे सुरू आहेत. खारघर, तळोजा, नवीन पनवेल परिसरात बांधकाम वेगाने सुरू आहे. त्यामुळे काही दिवसांपासून प्रदूषणात वाढ झाल्यामुळे यांत्रिकी पद्धतीचा वापर करून मुख्य रस्त्यांची साफसफाई करणे आवश्यक असल्यामुळे पनवेल महापालिकेद्वारे खारघर, कळंबोली, कामोठे, नवीन पनवेल येथील रस्त्यावरील धूळ साफ करण्यासाठी दोन स्विपिंग मशीन नेमण्यात आले आहे.
----------------------------
दिवसाला ४० किलोमीटर
खारघर, कळंबोली, कामोठे, नवीन पनवेल येथे दोन स्विपिंग मशीनद्वारे रस्त्यावरील धूळ साफ करण्यात येत आहे. एका शिफ्टमध्ये ४० किलोमीटर रस्त्याची साफसफाई करते. महापालिकेस प्रति किलोमीटर रुपये ९८५ एवढा खर्च येत असल्याचे उपायुक्त वैभव विधाते यांनी सांगितले.