जिल्हा सामान्य रुग्णालयात मेडीकल कॉलेज उभारा

जिल्हा सामान्य रुग्णालयात मेडिकल महाविद्यालय उभारा
धर्मवीर आनंद दिघे यांचे नाव द्या ः सुधीर कोकाटेंची मागणी
सकाळ वृत्तसेवा
ठाणे, ता. ९ ः ठाणे जिल्हा सामान्य (विठ्ठल सायन्ना) रुग्णालयाचे सुपरस्पेशालिटी रुग्णालयात रूपांतर करण्यात येत आहे. हे करत असताना येथे मेडिकल महाविद्यालय सुरू करण्याची मागणी स्थानिक माजी नगरसेवक सुधीर कोकाटे यांनी उपमुख्यमंत्री एकनाथ शिंदे यांच्याकडे निवेदनाद्वारे केली. त्या मेडिकल कॉलेजला धर्मवीर आनंद दिघे यांचे नाव देण्याची मागणीदेखील त्यांनी केली.
सध्या ठाणे जिल्ह्यात केवळ छत्रपती शिवाजी महाराज रुग्णालय येथे मेडिकल महाविद्यालय उपलब्ध आहे. प्रवेशसंख्या कमी असल्याने ठाणे जिल्ह्यातील अनेक विद्यार्थ्यांना वैद्यकीय शिक्षणासाठी इतर जिल्ह्यांत जावे लागते. वाढत्या लोकसंख्येच्या पार्श्वभूमीवर ठाण्यात आणखी एक मेडिकल महाविद्यालयाची गरज असल्याने लोकप्रतिनिधींकडून त्याची मागणी जोर धरू लागली आहे. अशातच ठाणे विठ्ठल सायन्ना (जिल्हा) सामान्य रुग्णालयाचे सुपरस्पेशालिटी रुग्णालयात रूपांतर होत आहे. या रुग्णालयामुळे जिल्ह्यातील रुग्णांना दर्जेदार आरोग्यसेवा मिळणार आहे. या सुविधांचा फायदा वैद्यकीय शिक्षणासोबत मिळाल्यास जिल्ह्याच्या वैद्यकीय व्यवस्थेला मोठे बळ मिळेल, त्यामुळे नव्याने उभारण्यात येणाऱ्या जिल्हा सामान्य रुग्णालयात वैद्यकीय महाविद्यालय सुरू करण्याची मागणी सुधीर कोकाटे यांनी एकनाथ शिंदे यांच्याकडे केली.