पालिका क्षेत्रात पाच सौरवृक्ष

पालिका क्षेत्रात पाच सौरवृक्ष
‘हरित पनवेल’च्या दिशेने महत्त्वाचे पाऊल
पनवेल, ता. १० (बातमीदार) ः महापालिकेला ‘माझी वसुंधरा अभियान ३.०’अंतर्गत मिळालेल्या राज्यस्तरीय तृतीय पारितोषिकातून शहरात पाच सौरवृक्ष उभारण्याची कामे पूर्ण केली आहेत. या प्रकल्पाने स्वच्छ ऊर्जा निर्मितीबरोबर पर्यावरण जनजागृतीला मोठे बळ मिळाले आहे.
महापालिकेने शहरातील पाच प्रमुख उद्यानांमध्ये आधुनिक सौरवृक्ष उभारण्यात आले आहेत. या प्रकल्पातून सौरऊर्जेचा प्रत्यक्ष अनुभव मिळेल, तसेच स्वच्छ ऊर्जेच्या वापराबाबत प्रोत्साहन मिळेल, असा विश्वास महापालिकेने व्यक्त केला आहे. शहरातील वायू गुणवत्ता सुधारण्यासाठी अत्याधुनिक उपक्रम राबविण्यात येत आहेत. धूळ नियंत्रणासाठी चार फॉग कॅनन वाहने, तसेच शहरातील विविध ठिकाणी वायू गुणवत्ता तपासण्यासाठी एअर मॉनिटरिंग व्हॅनची मदत घेतली जाते. याशिवाय नागरिकांना स्वच्छ हवा मिळावी, म्हणून शहरातील प्रमुख ठिकाणी पाच हवा शुद्धीकरण यंत्रणा बसवली आहे. तर लवकरच आणखी पाच ठिकाणी यंत्रणा बसवण्याची तयारी सुरू असल्याचे उपायुक्त स्वरूप खारगे यांनी सांगितले.
-----------------------
प्रभाग सेक्टर भूखंड क्रमांक
- ‘अ’ खारघर, सेक्टर २० २१
- नावडे तळोजा, सेक्टर १४ ९२
- ‘ब’ कळंबोली, सेक्टर ६ इ २
- ‘क’ कामोठे, सेक्टर ५ ४५
- ‘ड’ नवीन पनवेल, सेक्टर १६ ३