बॅंकेतील २२.८९ लाख लंपास

बॅंकेतील २२.८९ लाख लंपास
तळोज्यातील तरुणाला सायबर चोरांकडून गंडा
नवी मुंबई, ता. १० (वार्ताहर) ः तळोजा येथे राहणाऱ्या २२ वर्षीय तरुणाच्या नावावर असलेली २२ लाख ८९ हजारांची रक्कम सायबर चोरांनी लंपास केली आहे. या प्रकरणात तळोजा पोलिस ठाण्यात फसवणुकीसह आयटी ॲक्टनुसार गुन्हा दाखल आहे.
तळोजा येथे राहणाऱ्या तरुणाशी ऑगस्टमध्ये रविकुमार यादव नामक व्यक्तीने संपर्क साधला होता. या वेळी बँकेचे खाते तसेच गुगल पे ब्लॉक करण्याची भीती दाखवत ओटीपी पाठवावा लागेल, असे सांगितले. त्या ओटीपींचा गैरवापर करून सायबर चोरांनी ३१ ऑगस्ट रोजी १८ लाख रुपये, १ सप्टेंबर रोजी चार लाख ८९ हजार रुपये अशी २२ लाख ८९ हजारांची रक्कम ऑनलाइन लंपास केली. या प्रकाराची माहिती तरुणाने घरच्यांना दिल्यानंतर मंगळवारी (ता. ९) तळोजा पोलिस ठाण्यात तक्रार नोंदवली. या प्रकरणात कलम ३१८ (४) तसेच माहिती तंत्रज्ञान अधिनियम २०००चे कलम ६६ (क), ६६ (ड) अंतर्गत गुन्हा दाखल करण्यात आला आहे.