माणगावमध्ये क्रीडा महोत्सवाला प्रतिसाद

माणगावमध्ये क्रीडा महोत्सवाला प्रतिसाद
चित्तथरारक कसरतींनी प्रेक्षक मंत्रमुग्ध; कॅप्टन निर्मल सिंग रंधवा यांची प्रमुख उपस्थिती
माणगाव, ता. १० (वार्ताहर) : माणगाव शिक्षण प्रसारक मंडळाच्या सुधाकर नारायण शिपुरकर व गणेश यशवंत वाघरे, इंग्रजी माध्यम शाळेत वार्षिक क्रीडा महोत्सवाचे भव्य व दिमाखदार उद्‌घाटन शनिवारी निवृत्त सेनाधिकारी कॅप्टन निर्मल सिंग रंधवा यांच्या हस्ते झाले. विद्यार्थ्यांच्या किलबिलाटासोबतच पालक, शिक्षकवर्ग आणि ग्रामस्थांनी मोठ्या संख्येने हजेरी लावली होती.
क्रीडा महोत्‍सवावेळी मैदानावर रंगलेल्या कसरती, तालबद्ध कवायती आणि संतुलन कौशल्याचे अप्रतिम प्रदर्शन पाहून उपस्थित प्रेक्षक थक्क झाले. विद्यार्थ्यांनी सादर केलेले मानवी मनोरे, पिरॅमिड रचना, व्यायाम कौशल्य, तसेच तालबद्ध मार्चपास्टने क्रीडा महोत्सवाला आकर्षक रूप दिले. लहानग्यांच्या अथक प्रयत्नांबरोबरच शिक्षकवर्गाने घेतलेल्या मेहनतीची झलक प्रत्येक सादरीकरणात स्पष्ट जाणवत होती. शिस्त, संघभावना, एकजूट आणि आत्मविश्वासाचा सुंदर संगम पाहून उपस्थितांनी विद्यार्थ्यांचे भरभरून कौतुक केले. या वेळी कॅप्टन रंधवा यांनी विद्यार्थ्यांच्या क्रीडा कौशल्याचे कौतुक करताना सांगितले, क्रीडा आयुष्यात धैर्य, अनुशासन आणि टीमवर्कची शिकवण देते. आजच्या मुलांमध्ये हे सर्व गुण प्रभावीपणे दिसून आले. अशा मुलांमुळे देशाचे भविष्य नक्कीच भक्कम होईल. त्यांच्या प्रेरणादायी भाषणाने पालक आणि विद्यार्थी भारावून गेले. कार्यक्रमाला शाळेचे मुख्याध्यापक, शिक्षकवर्ग, पालक, माजी विद्यार्थी आणि क्रीडाप्रेमी नागरिक मोठ्या संख्येने उपस्थित होते. क्रीडा महोत्सवादरम्यान धावण्याच्या स्पर्धा, लेझीम, योगासन, दोरीखेच, तसेच विविध वयोगटांसाठी वेगवेगळ्या स्पर्धांचे आयोजन करण्यात आले होते. विद्यार्थ्यांनी उत्साह, आत्मविश्वास आणि खेळाडूवृत्ती दाखवत क्रीडा संस्कारांची उजळणी केली. क्रीडा महोत्सव विद्यार्थ्यांसाठी ऊर्जा, प्रेरणा आणि आनंदाची अविस्मरणीय पर्वणी ठरल्याचे मत पालकांनी नोंदवले.