कोट्यावधी कर थकवणाऱ्या सात मालमत्तांना पुन्हा आठवड्याची मुदतवाढ

कोट्यवधींच्या कर थकबाकीदारांना पुन्हा मुदतवाढ
महापालिकेकडून मालमत्तेच्या लिलावाची अंतिम तयारी सुरू

सकाळ वृत्तसेवा
मुंबई, ता. १० : मालमत्ता करापोटी तब्बल ६३ कोटी आठ लाखांहून अधिक रक्कम थकवणाऱ्या सात मालमत्तांना महापालिकेकडून लिलावापूर्वी अजून सात दिवसांची मुदतवाढ देण्यात आली आहे. याआधी २१ दिवसांची मुदत दिली होती; मात्र कर न भरल्याने पालिकेच्या कर निर्धारण व वसुली विभागाने कारवाईची प्रक्रिया सुरू ठेवली आहे. या मालमत्तांमध्ये व्यावसायिक तसेच निवासी मालमत्तांचा समावेश असून, प्रत्येक प्रभाग कार्यालयांतून नोटीस देऊनही कर भरण्यास मालमत्ताधारक टाळाटाळ करत आहेत.

जकात कर रद्द झाल्यानंतर मालमत्ता कर हा मुंबई पालिकेचा प्रमुख महसूल स्रोत राहिला आहे, परंतु अलीकडच्या काळात थकबाकीदारांची संख्या वाढत आहे. अनेक वर्षांपासून राज्य-केंद्र सरकारी कार्यालये, खासगी विकसक, तसेच न्यायालयीन खटल्यात अडकलेल्या मालमत्तांमधून मोठ्या प्रमाणात मालमत्ता कर बाकी आहे. यामुळे हजारो कोटींची थकबाकी अद्याप वसूल झालेली नाही. मुंबईतील चालू पायाभूत सुविधा प्रकल्पांना गती देण्यासाठी पालिकेला पुरेसा महसूल आवश्यक आहे. त्यामुळे थकबाकी वसुलीची मोहीम प्रशासनाने वेगात सुरू केली आहे.

.
सात मालमत्तांची विभागनिहाय थकबाकी
विभाग कार्यालय - मालमत्तेचा प्रकार - एकूण थकबाकी
ई - ऑइल मिल आणि गोदाम - १४१,९१,०८०
एफ दक्षिण - व्यावसायिक मालमत्ता - ८९,१५,९८८
जी दक्षिण - सीजे हाउस - १,६८,५३,२२७
एच पश्चिम - हास कॉमेट - १,६८,५३,२२७
पी उत्तर - व्यावसायिक मालमत्ता - १८,८८,१३,३७६
पी दक्षिण - हॉटेल इंपिरिअल पॅलेस - ३४,५५,६५,४९९
आर उत्तर - रहिवासी मालमत्ता - २,४१,६९,३२९

चौकट -
सात मालमत्तांची मूळ थकबाकी - ३०,८९,६६,४२९
झालेला दंड - ३२,१८,४६,००८
एकूण थकबाकी - ६३,०८,१२,४३७