अंबरनाथमध्ये गॅरेज फोडून इनोव्हा कारसह दोन कारच्या चाव्या लंपास

अंबरनाथमध्ये कार चोरीला, चाव्याही लंपास
अंबरनाथ, ता. १० (वार्ताहर) ः कार डेंटिंग आणि पेंटिंगसाठी गॅरेजला देणे एका ग्राहकाला चांगलेच महागात पडले. एका गॅरेजमध्ये घुसून चोरट्याने एक कार आणि आणखी दोन कारच्या चाव्या लंपास केल्या. चोरीची ही संपूर्ण घटना सीसीटीव्हीत कैद झाली आहे. अंबरनाथ पोलिस ठाण्यात अनोळखी चोरट्याविरोधात गुन्हा दाखल करण्यात आला आहे.
अंबरनाथ पश्चिम फॉरेस्टनाका परिसरात जयमोहन कुंजु पनीकर (वय ५९) यांचे मोहोपे मार्केट येथे गॅरेज आहे. सोमवारी रात्रीच्या सुमारास चोरट्याने गॅरेजच्या शटरचे कुलूप तोडून आत प्रवेश केला. या चोरट्याने मंदिराच्या ड्रॉवरमध्ये ठेवलेल्या दोन कारची चावी, तसेच गॅरेजमध्ये पार्क केलेली एक कार घेऊन पसार झाला. चोरीच्या ही संपूर्ण घटना सीसीटीव्हीत कैद झाली आहे. चोरट्याने सुमारे चार लाख ६० हजार रुपयांचा मुद्देमाल चोरून नेल्याचे फिर्यादीने पोलिसांना सांगितले आहे, तर या चोरट्याने इतर काही कार व दुचाकीच्याही चाव्या चोरून नेल्याने परिसरात खळबळ उडाली आहे. चोरीपूर्वी चोरट्यांनी संपूर्ण परिसराची पाहणी केली असावी, तसेच चाव्या त्याच्या ताब्यात असल्याने ते पुन्हा चोरीसाठी येण्याची शक्यता असल्याची भीती स्थानिक नागरिकांनी व्यक्त केली. पोलिस सीसीटीव्ही फुटेजच्या आधारे पुढील तपास करत आहेत.