अधिवेशनानिमित्त सुट्टीच्या दिवशी म्हाडा कार्यालय सुरू राहणार

सुट्टीच्या दिवशीही सुरू राहणार म्हाडाचे कार्यालय

मुंबई, ता. १० : नागपूर येथे सुरू असलेल्या विधिमंडळाच्या हिवाळी अधिवेशनाच्या पार्श्वभूमीवर म्हाडाचे कार्यालय शनिवार आणि रविवार या सुट्टीच्या दिवशी सुरू राहणार आहे. त्यामुळे संबंधित सर्व कर्मचाऱ्यांना कामावर हजर राहावे लागणार आहे. त्याबाबतचे परिपत्रक म्हाडाकडून काढले जाणार आहे. राज्य सरकारने यंदा हिवाळी अधिवेशन मर्यादित कालावधीसाठी घेतले असून रविवारी सूप वाजणार आहे. दरम्यान, शनिवार आणि रविवार या दोन दिवशी सरकारी कार्यालयांना सुट्टी असते; मात्र अधिवेशन सुरू असल्याने कोणतीही गैरसोय होऊ नये, सभागृहात एखादा महत्त्वाचा मुद्दा आल्यास त्याची तत्काळ माहिती उपलब्ध व्हावी, म्हणून म्हाडा प्रशासनाकडून आपले कार्यालय सुट्टीच्या दिवशीही सुरू ठेवले जाणार आहे.