म्हाडा १६ सुविधा भूखंडांची विक्री करणार

म्हाडा १६ सुविधा भूखंडांची विक्री करणार
सकाळ वृत्तसेवा
मुंबई, ता. १० : म्हाडाच्या मुंबई मंडळाकडून मालाड- मालवणी, उन्नतनगर- गोरेगाव, चारकोप- कांदिवली, टागोरनगर- विक्रोळी, कन्नमवारनगर- विक्रोळी, गोराई, आकुर्ली, विनोबा भावेनगर- कुर्ला, मुलुंड (पूर्व) या वसाहतींतील १६ सुविधा भूखंडांची विक्री केली जाणार आहे. त्यासाठी नोंदणीकृत निविदाकारांकडून शुक्रवार (ता. १२)पासून ऑनलाइन ई-निविदा मागवण्यात आल्या आहेत.

म्हाडाने विक्रीसाठी काढलेल्या भूखंडांमध्ये मालाड-मालवणी येथील सहा भूखंड शाळा, महाविद्यालय, रुग्णालय, खेळाचे मैदान यांसारख्या सुविधांसाठी उपलब्ध करून दिले जाणार आहेत. उन्नतनगर- गोरेगाव पश्चिम येथील एक भूखंड शाळेसाठी, चारकोप- कांदिवली येथील दाेन भूखंड अनुक्रमे रिटेल मार्केट आणि सुविधा भूखंडासाठी, विनोबा भावेनगर- कुर्ला येथील एक भूखंड समाजकल्याण केंद्रासाठी, मुलुंड (पूर्व) येथील एक भूखंड शॉपिंगसाठी, कन्नमवारनगर- विक्रोळी येथील एक भूखंड बहुउद्देशीय समुदाय केंद्रासाठी, टागोरनगर- विक्रोळी येथील एक भूखंड निवासी वापर व एक भूखंड प्राथमिक व माध्यमिक शाळेसाठी, गोराई व आकुर्ली येथील प्रत्येकी दाेन सुविधा भूखंड म्हणून आरक्षित आहेत. या सुविधांकरिता हे भूखंड ई-निविदा मागवून उपलब्ध करून दिले जाणार आहेत. हे भूखंड ३२ चौरस मीटर ते ७,१६० चौरस मीटर क्षेत्रफळाचे आहेत.
----
अंतिम तारीख १६ जानेवारीला
निविदा कागदपत्रे १२ डिसेंबर २०२५ रोजी दुपारी ३.३० पासून https://mahatenders.gov.in या संकेतस्थळावरून डाऊनलोड करता येणार आहे. बोलीपूर्व बैठक २ जानेवारी २०२६ रोजी दुपारी ३.३० वाजता होणार आहे. १६ जानेवारी २०२६ रोजी दुपारी ३.३०पर्यंत निविदा कागदपत्रे डाऊनलोड करण्याची शेवटची तारीख आहे. १६ जानेवारी २०२६ रोजी सायंकाळी ५.३०पर्यंत निविदा सादर करण्याची अंतिम तारीख आहे.