एपीमसी मार्केट मध्ये चीन मधील द्राक्ष

एपीएमसी मार्केटमध्ये आता चिनी द्राक्ष
भारतीय द्राक्षांपेक्षा जास्त भाव, २५० ते ३०० रुपये किलो
वाशी, ता. १० बातमीदार ः चिनी मालाने भारतीय बाजारपेठ काबीज केली आहे. प्लॅस्टिकची खेळणी, इलेक्ट्रॉनिक वस्तूच नव्हेतर आता खाण्याचे पदार्थ, फळेही चीनमधून भारतात येऊ लागली आहेत. आता नवी मुंबईच्या एपीएमसी बाजारात चिनी द्राक्षांची आयात झाली आहे. भारतीय द्राक्ष घेताना भाव करणारे चिनी द्राक्ष मात्र दुप्पट पैसे देऊन घेत असल्याचे चित्र आहे.
नवी मुंबईच्या एपीएमसी बाजारात सध्या विविध देशातील द्राक्षे दाखल व्हायला सुरुवात झाली आहे. सध्या चीनमधून द्राक्षे एपीएमसी मार्केटमध्ये दाखल होत आहेत. भारतीय द्राक्षांपेक्षा चीनच्या द्राक्षांना चांगली चव असल्याने ग्राहकांची द्राक्ष खरेदीला जास्त पसंती आहे. किमतीची तुलना केल्यास भारतीय द्राक्षे किलोला ८० ते १०० रुपयांना विकली जात आहेत, तर चिनी द्राक्षे ही २५० ते ३०० रुपये किलो विकली जात आहेत. सध्या एपीएमसी मार्केटमध्ये या द्राक्षांची आवक वाढली आहे. या परदेशी द्राक्षांना ग्राहकांची खूप पसंती मिळत असल्याचे व्यापाऱ्यांनी सांगितले.
----
अवकाळी पावसामुळे फटका
यासंदर्भात फळ मार्केटचे व्यापारी संजय पानसरे म्हणाले की, भारताने वर्ल्ड ट्रेड अ‍ॅर्ग्यूनजनबरोबर करार झाल्यापासून संपूर्ण जग आणि भारत हे पूर्णपणे एकत्र आलेले आहेत. सध्या एपीएमसी बाजारांमध्ये ५० ते ६० टक्के माल हा आखाती देशांमधून येत आहे. भारतामध्ये अवकाळी पावसामुळे द्राक्षाच्या पिकाला फटका बसला आहे, पण सध्या बाजारात द्राक्षे ही चीनमधून येत असून, त्यामध्ये शाईन मसकत, रेल ब्लू, क्रिमसम या जातीची द्राक्षे येत आहेत. त्याचा भाव २५० ते ३०० रुपये किलो आहे. भारतामध्येदेखील आता या झाडांची लागवड होण्यास सुरुवात झालेली आहे.