उमेदवारी अर्जासंबंधी याचिका फेटाळल्या

उमेदवारी अर्जासंबंधी
याचिका फेटाळल्या

सकाळ वृत्तसेवा
मुंबई, ता. १० : स्थानिक स्वराज्य संस्थांच्या निवडणुकांत बारामती आणि पुण्यातील काही उमेदवारांचे उमेदवारी अर्ज दाखल करून घेण्याचे संबंधित सत्र न्यायालयांनी निवडणूक अधिकाऱ्यांना दिलेले आदेश बेकायदा असल्याचे निरीक्षण नोंदवून उच्च न्यायालयाने ते आदेश बुधवारी (ता. १०) रद्द केले. 

उमेदवारांना दिलासा देणाऱ्या बारामती आणि पुणे सत्र न्यायालयाच्या आदेशाविरुद्ध राज्य निवडणूक आयोगाने उच्च न्यायालयात धाव घेतली होती. मुख्य न्यायमूर्तींच्या अध्यक्षतेखालील खंडपीठाने या याचिकांवर बुधवारी निर्णय देताना निवडणूक आयोगाच्या याचिका योग्य ठरवल्या. उमेदवारी अर्ज दाखल करून घेण्याचे आदेश सत्र न्यायालयाकडून निवडणूक अधिकाऱ्यांना देता येणार नाहीत. त्यामुळे बारामती आणि पुणे सत्र न्यायालयांनी अधिकार क्षेत्राबाहेर हे आदेश दिल्याचे न्यायालयाने उमेरदवारांना दिलासा नाकारताना अधोरेखित केले. 

हे उमेदवार निवडणूक अधिकाऱ्यांसमोर उमेदवारी अर्ज दाखल करण्यासाठी उपस्थितच नव्हते किंवा निर्धारित वेळेनंतर त्यांनी हजेरी लावल्यामुळे त्यांच्याबाबत जिल्हा न्यायालयाने निर्णय देण्याचा प्रश्नच उपस्थित होत नसल्याचा युक्तिवाद आयोगाकडून वकील सचिंद्र शेट्ये आणि अभिजित कुलकर्णी यांनी केला हाेता.