स्मशानभूमीवरील छप्परावर पत्रेच नाय

मुसारणे गावातील स्मशानभूमी छपराविना
उघड्यावर अंत्यसंस्कार करण्याची ग्रामस्थांवर वेळ

वाडा, ता. ११ (बातमीदार) : वाडा तालुक्यातील मुसारणे या गावासाठी असलेल्या स्मशानभूमीवर पत्रेच नसल्याने येथील नागरिकांना उघड्यावरच अंत्यसंस्कार करावे लागत आहेत. त्यामुळे नागरिकांकडून संताप व्यक्त केला जात आहे.
तालुक्यातील मुसारणे ही नावाजलेली ग्रामपंचायत असून, या ग्रामपंचायत अंतर्गत घोडविंदे पाडा, पष्टेपाडा, पाटील पाडा ही गावे येतात. या ग्रामपंचायतीची लोकसंख्या १,२०० च्या आसपास आहे. मुसारणे गावासाठी स्वतंत्र स्मशानभूमी असून तिची दुरवस्था झाली आहे. स्मशानभूमीवरील छप्पर गायब झाले असून, येथील नागरिकांना आपल्या शेतजमिनीवर अंत्यसंस्कार करावे लागत आहेत. त्यामुळे स्मशानभूमीची दुरुस्ती करा अन्यथा नवीन बनवा, अशी मागणी ग्रामस्थ वारंवार करीत आहेत, मात्र ग्रामपंचायत प्रशासन त्याला केराची टोपली दाखवत असल्याचा आरोप येथील नागरिक करत आहेत. दरम्यान, स्मशानभूमीची दुरूस्ती तत्काळ न केल्यास तीव्र आंदोलन छेडण्याचा इशारा ग्रामस्थांनी ग्रामपंचायत प्रशासनाला दिला आहे.

मुसारणे गावासाठी नवीन स्मशानभूमी मंजूर झाली असून लवकरच तिचे काम हाती घेण्यात येईल.
- विठ्ठल झुंजार, ग्रामपंचायत अधिकारी, मुसारणे