टायर कंपनीविरोधात एल्गार

टायर कंपनीविरोधात एल्गार
कुणबी सेनेकडून गावबैठका, आंदोलन छेडणार
वाडा, ता. ११ (बातमीदार)ः आब्जे ग्रामपंचायत हद्दीतील टायर कंपनीमुळे होणाऱ्या प्रदूषणामुळे ग्रामस्थांनी कंपनीला विरोध दर्शवला आहे. या लढाईत कुणबी सेना प्रशासनााविरोधात ग्रामस्थांच्या बाजूने लढणार असून, गावबैठकांमधून आंदोलनाची रणनीती आखली जात आहे.
वाडा तालुक्यातील आब्जे येथे मेसर्स पच्युएट रिसायकलिंग सोल्युशन प्रा. लिमिटेड कंपनी टायरनिर्मिती करणार आहे. या कंपनीने ग्रामपंचायतीकडून आवश्यक असणाऱ्या सर्व परवानग्या घेतल्या असून, बांधकाम सुरू केले आहे, पण या कंपनीमुळे मोठ्या प्रमाणात प्रदूषण होण्याची भीती ग्रामस्थांमध्ये आहे. त्यामुळे कंपनीविरोधातील वातावरण तयार झाले आहे. ग्रामस्थांच्या लढ्यात कुणबी सेना उतरली आहे. याच अनुषंगाने कुणबी सेनेचे प्रमुख विश्वनाथ पाटील, नेते प्रदीप हरड, विठ्ठल गोरे यांनी ग्रामस्थांच्या बैठका घेण्यास सुरुवात केली आहे. तसेच प्रशासनाने एका आठवड्यात ग्रामस्थांच्या शंकांचे निरसण केले नाही, तर जिल्हाधिकारी कार्यालयावर मोर्चा काढण्याचा इशारा दिला आहे.