खारघरमध्ये पावणेतीन कोटींचा गुटखा नष्ट

खारघर, ता. ११ (बातमीदार) : नवी मुंबई अमली पदार्थ विरोधी पथकाने जुलैमध्ये भिवंडी आणि कामोठे येथे अवैध विक्रीसाठी आणलेला दोन कोटी ७२ लाखांचा गुटखा जप्त केला होता. न्यायालयाच्या आदेशानुसार खारघर डोंगरात गुरुवारी (ता. ११) तो जाळून नष्ट केला.

२१ जुलैला कामोठे येथे टेम्पोमध्ये गुटखा घेऊन येत असल्याची माहिती नवी मुंबई अमली पदार्थ विरोधी पथकास प्राप्त झाल्यावर पथकाने चालकाला ताब्यात घेत हा गुटखा भिवंडी येथून मिळाल्याचे सांगितले. पथकाने २३ जुलै रोजी भिवंडी येथे धाड टाकली असता विक्रीसाठी आणलेल्या चार कंटेनरमध्ये गुटखा आढळून आला. गुटखा आणि टेम्पो, कंटेनर ताब्यात घेऊन पाच संशयितांना अटक केली. हा जप्त गुटखा गुरुवारी खारघर ओवे कॅम्प येथील तलावाशेजारी खड्डा खोदून जाळून नष्ट करण्यात आला. या वेळी सहाय्यक पोलिस निरीक्षक सूरज गोरे, पोलिस कर्मचारी अंकुश म्हात्रे, कृष्णा धोंडे, रमेश तायडे, परमेश्वर भाबड, तुकाराम सोनवलकर उपस्थित होते.