तेजोमय युवा प्रतिष्ठानच्या शैक्षणिक मार्गदर्शन शिबिराला सुरवात

दहावीच्या विद्यार्थ्यांसाठी मार्गदर्शन शिबिराला सुरवात
कल्याण, ता. १३ (वार्ताहर) : जोमय युवा प्रतिष्ठान, श्रीमलंगगड यांच्या वतीने १० वीच्या विद्यार्थ्यांसाठी आयोजित केलेल्या तीनदिवसीय मोफत शैक्षणिक मार्गदर्शन शिबिराला श्री शनैश्वर देवस्थान, करवले येथे उत्साहात सुरुवात झाली. शिक्षणप्रेमी-समाजसेवक प्रणव गायकवाड यांच्या हस्ते शिबिराचे उद्घाटन झाले. मलंगगड परिसरातील आठ शाळांमधील सुमारे ८०० विद्यार्थ्यांनी या शिबिरात उत्स्फूर्त सहभाग नोंदवला आहे.
अधिव्याख्याता दिनेश चौधरी आणि व्याख्याते विश्वास भोईर यांनी विद्यार्थ्यांना अभ्यासाच्या पद्धती आणि पाठांतर दीर्घकाळ स्मरणात ठेवण्याचे तंत्र यावर मार्गदर्शन केले. उल्हासनगर कृ. ऊ. बा. स. संचालक राजेंद्र वारे, महात्मा गांधी स्कूलचे मुख्याध्यापक अजयकुमार जोगी, संस्थेचे अध्यक्ष जीवन मढवी, अविनाश साळवी आदी मान्यवर या वेळी उपस्थित होते. प्रणव गायकवाड यांनी अशा उपक्रमांमुळे विद्यार्थ्यांचे भविष्य अधिक सक्षम होईल, असा विश्वास व्यक्त केला. या तीन दिवसांत गणित, इंग्रजी, विज्ञान, इंग्रजी ग्रामर या विषयांवर तज्ज्ञ व्याख्याते मार्गदर्शन करणार आहेत.