नायगाव पुलाची बांधकाम विभाग आणि रेल्वेकडून पाहणी

नायगाव पुलाची बांधकाम विभाग आणि रेल्वेकडून पाहणी
विरार, ता. १४ (बातमीदार) : नायगाव-पापडी रस्त्यावरील खाडी पुलाला तडे गेल्याच्या तक्रारीनंतर सार्वजनिक बांधकाम विभाग (पीडब्ल्यूडी) आणि रेल्वे एमआरवीसीच्या अधिकाऱ्यांनी काल या पुलाची पाहणी केली. पुलाची वाढती धोकादायक स्थिती लक्षात घेऊन ग्रामस्थांनी या वेळी पुलाचे स्ट्रक्चरल ऑडिट करण्याची मागणी अधिकाऱ्यांकडे केली.
पुलाचे तातडीने स्ट्रक्चरल ऑडिट करण्यात यावे. पुलावरून अवजड वाहनांची वाहतूक संपूर्णपणे बंद करावी. पुलाच्या सुरक्षिततेसाठी हाईट बॅरिअर लावण्यात यावेत तसेच अंदाजे ५० वर्षे जुना असलेला हा पूल नागरिकांच्या सुरक्षेच्या दृष्टीने तोडून नवीन खाडीपूल बांधण्याची प्रक्रिया तातडीने सुरू करावी, अशा मागण्या ग्रामस्थांनी या वेळी केल्या.
या पाहणीसाठी पीडब्ल्यूडीचे कनिष्ठ अभियंता किशोर मराठे आणि एमआरवीसीचे एईएम विजय वार्षने उपस्थित होते. या वेळी ज्येष्ठ कार्यकर्ते मच्छिंद्र धोंडेकर, नायगाव मच्छीमार सोसायटीचे उपाध्यक्ष सतीश कोळी, माजी सरपंच गंगाधर धोंडेकर यांच्यासह अनेक ग्रामस्थ उपस्थित होते.

नायगाव-उमेळा रस्त्याची पाहणी
रेल्वेच्या माती भरावामुळे नायगाव स्थानक ते उमेळा फाटक रस्त्याची दुरवस्था झाली आहे. ग्रामस्थांच्या तक्रारीनंतर एमआरवीसी आणि पीडब्ल्यूडीच्या अधिकाऱ्यांनी या रस्त्याचीही पाहणी केली. रेल्वेच्या अवजड ट्रकमुळे रस्ते खराब झाल्याचे मान्य करत, लवकरच दुरुस्ती करण्याचे आश्वासन देण्यात आले. तसेच सद्यस्थितीत अवजड वाहतूक बंद करण्यास सांगितले आहे.