गोपीनाथ मुंडे यांनी फक्त कार्यकर्ते नाही तर नेते घडविले - अनिल फड

गोपीनाथ मुंडेंनी कार्यकर्ते नाही, तर नेते घडविले
अनिल फड यांचे प्रतिपादन
कल्याण, ता. १४ (वार्ताहर) : अखिल महाराष्ट्र वंजारी सेवा समिती कल्याण यांच्या वतीने गोपीनाथ मुंडे जयंती उत्सव समितीचे अध्यक्ष आत्माराम फड यांच्या नेतृत्वाखाली लोकनेते गोपीनाथ मुंडे यांच्या जयंतीनिमित्त वंजारी भवन कल्याण येथे कार्यक्रम पार पडला. त्या वेळी डीएनटी फाउंडेशन दिल्लीचे कार्यवाह अनिल फड प्रमुख पाहुणे म्हणून बोलत होते.
लोकनेते गोपीनाथ मुंडे हे वंजारी समाजासाठी दैवत आहेत, त्यांनी वंजारी समाजासाठी दिलेले योगदान सर्वश्रुत आहे, परंतु त्यांनी वंजारी समाजाव्यतिरिक्त धनगर, माळी, बंजारा, दलित, पारधी अशा विविध बहुजन समाजासाठीदेखील तेवढेच योगदान दिले. त्यांनी या सर्व बहुजन समाजातील कार्यकर्त्यांना तुम्ही नेते बना आणि सत्तेत सामील व्हा, असे आवाहनही ते करत होते. आजही महाराष्ट्रात त्यांनी घडवलेले नेते विविध क्षेत्रात आपलं कर्तृत्व गाजवत आहेत, असे अनिल फड यांनी म्हटले आहे.
या वेळी प्रमुख पाहुणे विक्रम बोडके यांनी गोपीनाथ मुंडे यांच्या कार्याचा आढावा घेऊन त्यांच्या आठवणी कथन केल्या. या वेळी कवी रमेश आव्हाड यांच्या काव्य वाचनाचा कार्यक्रम झाला. या वेळी माळी समाजाचे कार्यकर्ते व गोपीनाथ मुंडे फाउंडेशनचे अध्यक्ष प्रशांत माळी यांनी गोपीनाथ मुंडे यांचे नाव कल्याण कृषी उत्पन्न बाजार समितीच्या एका प्रवेशद्वाराला देण्याची मागणी केली.
कार्यक्रम यशस्वी करण्यासाठी रामनाथ दौंड, भाऊसाहेब आंधळे, माधवराव आव्हाड, किरण दराडे, योगेश भाबड, माधव दराडे, अनिल दौंड, वंदना सानप, लता पालवे यांनी विशेष परिश्रम घेतले.