खासगी शाळेतील मुलांच्या आरोग्याशी खेळ

खासगी शाळेतील मुलांच्या आरोग्याशी खेळ
बाथरूमला गटाराचे पाणी
सकाळ वृत्तसेवा, ठाणे

ठाणे, ता. १५ : दिव्यातील मातोश्रीनगर येथील एका खासगी शाळेत लहान मुलांच्या आरोग्याशी खेळला जात असलेला धक्कादायक प्रकार समोर आला आहे. येथील ड्यू ड्रॉप नावाच्या शाळेत पाण्याची मोटार लावून चक्क गटाराचे पाणी विद्यार्थ्यांना बाथरूममध्ये वापरायला दिले जात होते. काही पालकांनी दिवा मनसेच्या महिला शाखाध्यक्ष अंकिता कदम यांच्याकडे शाळेत गटाराचे पाणी वापरले जात असल्याची तक्रार केली.

तक्रारीची खात्री करण्यासाठी मनसे पदाधिकाऱ्यांनी शुक्रवारी (ता. १३) शाळेला भेट दिली. त्या वेळी ही धक्कादायक बाब उघड झाली. भावी पिढीच्या आरोग्याशी खेळणाऱ्या शाळा संचालक उत्तम सावंत यांच्यावर गुन्हा दाखल करून कडक कारवाई करण्याची मागणी मनसेकडून करण्यात आली आहे. मनसेच्या पदाधिकाऱ्यांनी तातडीने या घटनेचे व्हिडिओ पुरावे ठाणे महापालिकेच्य शिक्षण विभागाचे उपायुक्त सचिन सांगळे यांच्या निदर्शनास आणून दिले. उपायुक्तांनी घटनेचे गांभीर्य लक्षात घेऊन तत्काळ पाहणीसाठी शिक्षण विभागाचे पथक पाठवत असल्याचे सांगितले.

मनसेने शिक्षण विभागाने संबंधित शाळेची मान्यता रद्द करून मुलांना दुसऱ्या शाळेत न्यावे, अशी मागणी केली आहे. मनसेचे दिवा शहर सचिव प्रशांत गावडे यांनी माहिती दिली की, शनिवार आणि रविवार असल्याने शिक्षण विभागाने काय कारवाई केली, याची विचारणा महापालिकेत जाऊन केली जाईल. या वेळी मनसेचे दिवा शहर सचिव प्रशांत गावडे, विभाग अध्यक्ष प्रकाश पाटील, उपविभाग अध्यक्ष शैलेंद्र कदम, उपशाध्यक्ष जितेंद्र गुरव हे पदाधिकारी उपस्थित होते.

पालकांच्या तक्रारीनुसार पाहणी केल्यावर धक्कादायक बाब पुढे आली. तातडीने ते व्हिडिओ ठाणे महापालिकेच्या शिक्षण विभागाला पाठविण्यात आल्यावर शिक्षण विभागाने पाहणी केली; मात्र शनिवार आणि रविवार असल्याने काय कारवाई केली. याबाबत सोमवारी शिक्षण विभागाकडे विचारणा केली जाणार आहे. तसेच पोलिसांनाही निवेदन देत, गुन्हा दाखल करण्याची मागणी केली जाणार आहे, अशी माहिती मनसेचे दिवा शहर सचिव प्रशांत गावडे यांनी दिली.