पायी दिंडी सोहळ्याने मंगल प्रारंभ

गोवेली येथे राज्यस्तरीय अखंड हरिनाम सप्ताह
मुख्यमंत्री, केंद्रीय मंत्र्यांची विशेष उपस्थिती
टिटवाळा, ता. १५ (वार्ताहर) : अखिल ठाणे जिल्हा वारकरी संप्रदायाच्या वतीने गोवेली येथे रामायणाचार्य हभप विश्वनाथ वारिंगे यांच्या मार्गदर्शनाखाली राज्यस्तरीय अखंड हरिनाम सप्ताह व धर्मजागरण महोत्सव साजरा करण्यात येणार आहे. मंगळवारी (ता. १६) ते २३ डिसेंबरपर्यंत हा महोत्सव गोवेलीतील क्रीडा संकुलात होणार आहे.
या महोत्सवाला मुख्यमंत्री देवेंद्र फडणवीस यांच्यासह देशभरातील अनेक मान्यवरांची उपस्थिती लाभणार आहे. कार्यक्रमाचे स्वागताध्यक्ष म्हणून माजी केंद्रीय मंत्री व माजी खासदार कपिल पाटील उपस्थित राहणार आहेत. दिंडीची सुरुवात श्रीक्षेत्र टिटवाळा येथील महागणपती मंदिर चौकातून होऊन ती गोवेलीपर्यंत मार्गक्रमण करणार आहे.

अश्वांच्या रिंगण सोहळ्याची अनुभूती
टिटवाळा येथून गोवेलीकडे मंगळवारी पायी दिंडी निघणार आहे. या दिंडीमुळे संपूर्ण परिसर वारकरी संप्रदायाच्या गजराने दुमदुमणार आहे, तर या पायी दिंडीचे वैशिष्ट्य म्हणजे माउलींच्या अश्वांच्या भव्य रिंगण सोहळ्याची अनुभूती मिळणार आहे. यामध्ये हजारो टाळकरी व तुळशीधारी वारकरी, शेकडो पखवाजांचे निनाद, साधुसंतांची उपस्थिती, कलशधारी महिला, घोडे आणि लेझीम पथकांचा सहभाग असणार आहे.

एक लाख पुरणपोळ्यांचा महाप्रसाद
महोत्सवाच्या समारोपदिनी मंगळवारी (ता. २३) काल्याचे कीर्तन होणार असून, एक लाख पुरणपोळ्यांचा महाप्रसाद अर्पण केला जाणार आहे. संत पूजन व २५ हजार दिव्यांचा दिव्य दीपोत्सव सोहळा पार पडणार आहे, असे स्वागताध्यक्ष कपिल पाटील यांनी सांगितले.

आचार्यांकडून मार्गदर्शन
कांची पीठाचे जगद्गुरू शंकराचार्य श्रीविजयेंद्र सरस्वती, श्रीराज जन्मभूमी न्यासाचे कोषाध्यक्ष स्वामी श्री गोविंददेव गिरीजी, बालयोगी श्री सदानंद, शांतीब्रम्ह श्रीगुरू मारुती कुऱ्हेकर, गहिनीनाथ हौसेकर, स्वामी श्री जितेंद्रानंद यांच्याकडून भाविकांना मार्गदर्शन केले जाणार आहे. रामायणाचार्य विश्वनाथ महाराज वारिंगे यांच्या मार्गदर्शनाखाली मंडल अध्यक्ष माधव महाराज केशव यांच्यातर्फे महोत्सवाचे नियोजन करण्यात आले आहे.

मोफत आरोग्य चिकित्सा शिबिर
धर्म जागरण महोत्सवाच्या ठिकाणी मोफत आरोग्य चिकित्सा शिबिरही भरविले जाणार आहे. त्याचबरोबर भव्य रांगोळी प्रदर्शन होईल.