नाराज कार्यकर्त्यांचा शिवसेनेला जय महाराष्ट्र

नाराज कार्यकर्त्यांचा सेनेला ‘जय महाराष्ट्र’
समीर, सोनिया म्हात्रे यांचा भाजपमध्ये प्रवेश!

अंबरनाथ, ता. १५ (वार्ताहर) : ऐन निवडणुकीच्या तोंडावर अंबरनाथ शिवसेनेला मोठा धक्का बसला आहे. शिवसेनेचे उपशहर पदाधिकारी समीर म्हात्रे आणि शिवसेनेच्या महिला शहर संघटक सोनिया म्हात्रे यांनी शेकडो महिला-पुरुष कार्यकर्त्यांसह रविवारी (ता. १४) भारतीय जनता पक्षात (भाजप) जाहीर प्रवेश केला.

शिवसेनेत योग्य वागणूक मिळाली नाही. निवडणुकीच्या काळात आपला विचार करण्यात आला नाही, यामुळे नाराज होऊन त्यांनी भाजपमध्ये प्रवेश केल्याचे म्हात्रे दाम्पत्याने सांगितले. म्हात्रे दाम्पत्याने गेल्या १० वर्षांपासून शिवसेनेच्या वतीने वडोल परिसरात काम केले होते; मात्र ऐन निवडणुकीत अन्याय झाल्याची खंत त्यांनी व्यक्त केली.

रविवार दुपारी भारतीय जनता पक्षाच्या मध्यवर्ती जनसंपर्क कार्यालयात हा प्रवेश सोहळा मोठ्या उत्साहात पार पडला. माजी नगराध्यक्ष तथा भाजप महाराष्ट्र राज्य परिषद सदस्य गुलाबराव करंजुळे-पाटील, कल्याण जिल्हा सरचिटणीस अभिजित करंजुळे-पाटील, व्यापारी संघटनेचे खानजी धल आदी या वेळी उपस्थित होते. या वेळी बोलताना भाजप महाराष्ट्र राज्य परिषद सदस्य गुलाबराव करंजुळे-पाटील यांनी सांगितले की, म्हात्रे दाम्पत्याचा भाजप प्रवेश दोन महिन्यांपूर्वीच अपेक्षित होता, मात्र काही कारणांमुळे तो लांबला. आज अखेर त्यांनी अधिकृत प्रवेश केला असून, भाजपकडून त्यांना सन्मानाची वागणूक आणि योग्य कार्य करण्याची संधी दिली जाईल, अशी ग्वाही करंजुळे-पाटील यांनी दिली.

राजकीय वातावरण तापले
ऐन निवडणुकीच्या तोंडावर शेकडो कार्यकर्त्यांनी भाजपमध्ये प्रवेश केल्यामुळे अंबरनाथमध्ये भाजपची ताकद अधिक भक्कम होत असल्याचे चित्र आहे. समीर म्हात्रे आणि सोनिया म्हात्रे यांच्या भाजप प्रवेशामुळे अंबरनाथमध्ये पुन्हा एकदा फोडाफोडीच्या राजकारणाने वातावरण चांगलेच तापले असून, राजकीय हालचालींना वेग आला आहे.