गुणवत्तेचा गौरव म्हणजेच विद्यार्थ्यांमध्ये आत्मविश्वासाची पेरणी : डॉ. कविता राणे

गुणवत्तेचा गौरव म्हणजेच विद्यार्थ्यांमध्ये आत्मविश्वासाची पेरणी : डॉ. कविता राणे
अलिबाग, ता. १५ (वार्ताहर) ः विद्यार्थ्यांचा सन्मान म्हणजे त्यांच्या भविष्यासाठीची गुंतवणूक आहे, असे मत प्रमुख पाहुण्या वृत्तनिवेदिका डॉ. कविता राणे यांनी व्यक्त केले. अलिबाग तालुक्यातील वेश्वी येथील प्रभाकर पाटील एज्युकेशन सोसायटीच्या सभागृहात रविवारी (ता. १४) पीएनपी एज्युकेशन सोसायटीतर्फे भव्य गुणगौरव सोहळ्याचे आयोजन करण्यात आले होते. शैक्षणिक क्षेत्रात उल्लेखनीय कामगिरी करणाऱ्या विद्यार्थ्यांसह शिक्षक व शिक्षकेतर कर्मचाऱ्यांचा या वेळी मान्यवरांच्या हस्ते सन्मान करण्यात आला.
या वेळी प्रमुख पाहुण्या डॉ. कविता राणे यांनी आपल्या शालेय जीवनातील आठवणी सांगत स्व. प्रभाकर पाटील यांच्या कार्याचा उल्लेख केला. विद्यार्थ्यांच्या भाषणांचे कौतुक करताना ते प्रत्यक्ष सन्मान देत असत. त्यामुळे विद्यार्थ्यांमध्ये आत्मविश्वास, उत्साह आणि प्रेरणा निर्माण होत असे, असे त्यांनी सांगितले. कार्यक्रमाच्या प्रस्तावनेत चित्रलेखा पाटील यांनी पीएनपी एज्युकेशन संस्था सातत्याने प्रगती करत असून, दरवर्षी शैक्षणिक दर्जात सुधारणा केली जात असल्याचे सांगितले. भविष्यात प्रत्येक दहा गावांमागे एक आधुनिक सीबीएसई शाळा उभारण्याचे ध्येय असल्याचे त्यांनी स्पष्ट केले. संस्थेच्या शाळा व महाविद्यालयांचा निकाल सातत्याने १०० टक्के लागत असून, या यशात शिक्षक व कर्मचाऱ्यांचा सिंहाचा वाटा असल्याचे त्यांनी नमूद केले. या कार्यक्रमाला पीएनपी एज्युकेशन सोसायटीच्या कार्यवाह चित्रलेखा पाटील, संस्थेचे प्रशासकीय सल्लागार गबाजी गीते, पीएनपी कॉलेजचे संचालक विक्रांत वार्डे, कॉलेजचे प्राचार्य डॉ. ओमकार पोटे, प्राचार्य रवींद्र पाटील, मुख्याध्यापक नीलेश मगर, प्रशासन अधिकारी हिरेन राठोड, जनसंपर्क अधिकारी अमोल नाईक, अ‍ॅकॅडमिक डायरेक्टर राजश्री पाटील, लेखापाल मनिषा रेलकर यांच्यासह शिक्षक, शिक्षकेतर कर्मचारी, विद्यार्थी व पालक मोठ्या संख्येने उपस्थित होते.