गार्डन बचावासाठी मनसेची इशारा रॅली

सिडकोविरोधात मनसेची नेरूळमध्ये बाइक रॅली
नेरूळ, ता. १५ (बातमीदार) ः नेरूळ सेक्टर २८ येथील आरक्षित भूखंड सिडकोने बिल्डरच्या घशात घालण्याचा घाट घातला आहे, असा आरोप मनसेने केला आहे. याविरोधात मनसेने नेरूळमध्ये बाइक रॅली काढत सिडकोचा निषेध केला.
पाच एकरचे गार्डन, मैदान, पोलिस ठाणे, दिव्यांग केंद्र, ज्येष्ठ नागरिक यासाठी आरक्षित भूखंड सिडकोने बिल्डरच्या घशात घालण्याचा घाट घातला आहे. महापालिका आयुक्त या भूखंडावर फलक लावणार होते; परंतु अद्याप तो लागलेला नाही. येत्या काही दिवसात पालिकेने फलक लावला नाही, तर मनसेकडून भीक मांगो आंदोलन करण्यात येईल आणि ते पैसे आयुक्तांना देण्यात येतील, असा इशारा मनसे प्रवक्ते व शहराध्यक्ष गजानन काळे यांनी दिला.
या वेळी शहर सचिव विलास घोणे, सचिन कदम, शहर सहसचिव अभिजित देसाई, वाहतूक सेना सरचिटणीस नितीन खानविलकर, चित्रपट सेना उपाध्यक्ष श्रीकांत माने, विद्यार्थी सेना शहर अध्यक्ष संदेश डोंगरे, रोजगार शहराध्यक्ष सनप्रीत तुर्वेकर, चित्रपट सेना शहर अध्यक्ष अनिकेत पाटील, महिला सेना उपाध्यक्ष अनिथा नायडू, दीपाली ढवूल, मनसे विभागाध्यक्ष विशाल गाडगे, अनिकेत भोपी, निखिल गावडे, उमेश गायकवाड, अक्षय भोसले व पदाधिकारी उपस्थित होते.