पनवेल महापालिकेकडून पर्यावरण सेवा योजनेअंतर्गत विविध स्पर्धांचे आयोजन

पनवेल पालिकेकडून पर्यावरण सेवा योजनेअंतर्गत विविध स्पर्धा
कामोठे, ता. १५ (बातमीदार) ः माझी वसुंधरा अभियान ६.० अंतर्गत पर्यावरण संवर्धन व संरक्षणाचे महत्त्व शालेय स्तरावर व महाविद्यालयीन विद्यार्थ्यांमध्ये प्रत्यक्ष कृतीद्वारे बिंबवण्यासाठी पनवेल पालिकेकडून विविध स्पर्धा घेण्यात आल्या आहेत. या उपक्रमांतर्गत महानगरपालिका आयुक्त मंगेश चितळे यांच्या मार्गदर्शनाखाली कामोठे येथील दि. बा. पाटील शाळेत स्पर्धा व व्याख्यानाचा कार्यक्रम पार पडला. या वेळी विद्यार्थ्यांना कचरा व्यवस्थापनाबाबत माहिती देण्यात आली.
विद्यार्थ्यांना पर्यावरणाचे महत्त्व समजावे यासाठी पर्यावरण सेवा योजना महापालिकेच्या वतीने पालिका कार्यक्षेत्रातील माध्यमिक विद्यालयांमध्ये व महाविद्यालयांमध्ये राबविण्यात येत आहे. या पर्यावरण सेवा योजनांतर्गत आकाश, जल, वायू, भूमी, अग्नि या माझी वसुंधरा अभियानातील महत्त्वाच्या घटकांनुसार कृती कार्यक्रम, शिबिरे, व्याख्याने, वक्तृत्व स्पर्धा, पोस्टर स्पर्धा, वृक्षारोपण, प्रश्नमंजूषांचे आयोजन विद्यालयांमध्ये करण्यात येत आहेत.