अंतिम प्रभाग रचनेत मतदार संख्या जैसे थे

अंतिम प्रभागरचनेत मतदारसंख्या ‘जैसे थे’
२७ आणि २८ मध्ये घट, २९ मध्ये वाढ
सकाळ वृत्तसेवा
ठाणे, ता. १५ : महापालिका निवडणुकीच्या पार्श्वभूमीवर पालिकेच्या निवडणूक विभागाने सोमवारी (ता. १५) अंतिम मतदार यादी प्रसिद्ध केली आहे. या मतदार यादीत मतदारांची एकूण संख्या ‘जैसे थे’ असली, तरी प्रभागनिहाय आकडेवारीत बदल दिसून आले आहेत. प्रभाग क्रमांक २७ आणि २८ मध्ये मतदारांची संख्या घटली आहे, तर प्रभाग क्रमांक २९ मध्ये लक्षणीय वाढ झाली आहे.

ठाणे पालिका क्षेत्रात निवडणुकीच्या पार्श्वभूमीवर नोंदणीचा आढावा घेतला असता, चार लाख २१ हजार २५६ नवीन मतदारांची वाढ झाल्याचे दिसून येत आहे. २०१७ च्या निवडणुकीत एकूण मतदारसंख्या १२ लाख २८ हजार ६०६ होती. यामध्ये सहा लाख ६७ हजार ५०४ पुरुष; तर पाच लाख ६१ हजार ०८७ आणि इतर १५ होते. यावर्षीच्या आकडेवारीनुसार, पुरुष मतदारसंख्या आठ लाख ६३ हजार ८७४, महिला सात लाख ८५ हजार ८३०, तर इतर मतदार १५८ झाली आहे. अंतिम मतदार यादीत पुरुष मतदारांची संख्या अवघ्या तीनने घटल्याचे दिसून आले, तर महिला मतदारांची संख्या ‘जैसे थे’ आहे.

ठाणे पालिकेच्या निवडणूक विभागाने २० नोव्हेंबर रोजी प्रारूप मतदार यादी प्रसिद्ध करून त्यावर ३ डिसेंबरपर्यंत हरकती व सूचना मागवल्या होत्या. प्राप्त हरकतींवर निर्णय घेऊन सोमवारी अंतिम मतदार यादी प्रसिद्ध करण्यात आली. प्रभाग क्रमांक २९ मध्ये वाढलेले मतदान कोणाला फायदा देणार आणि घटलेल्या मतदारांचा कोणाला फटका बसणार, हे पाहणे औत्सुक्याचे ठरणार आहे. वाढलेल्या मतदारांचा कल कोणत्या पक्षाच्या बाजूने झुकतो, हेच आगामी ठाणे महापालिका निवडणुकीतील सर्वात मोठे औत्सुक्य ठरणार आहे.

प्रभागनिहाय बदल
प्रभाग क्र. २७ (दिवा स्थानक, नागवाडी, साईनाथ नगर) : या प्रभागातील मतदारसंख्या ४३३ ने घटली आहे.
प्रभाग क्र. २८ (मुंब्रा देवी कॉलनी) : या प्रभागातील मतदारसंख्या ३ ने घटली आहे.
प्रभाग क्र. २९ (दिवा पूर्व, साबेगाव) : या प्रभागात मतदारसंख्या ४३६ ने वाढली आहे.