नववर्षात २४ सार्वजनिक सुट्ट्या जाहीर

नववर्षात २४ सार्वजनिक सुट्ट्या जाहीर
अनेक सण-उत्सव रविवारी; ४६ विवाह मुहूर्तांमुळे समारंभांना गती
अलिबाग, ता. १५ वार्ताहर ः २०२५ वर्षाला अवघे काही दिवस शिल्लक असतानाच २०२६ या नववर्षाची चाहूल लागली आहे. महाराष्ट्र शासनाने २०२६ साठी एकूण २४ सार्वजनिक सुट्ट्या जाहीर केल्या असून, त्यात राष्ट्रीय तसेच प्रादेशिक सण-उत्सवांचा समावेश आहे, मात्र यंदा अनेक महत्त्वाचे सण, उत्सव हे दुसरा व चौथा शनिवार तसेच रविवारी येत असल्याने नोकरदारवर्गाच्या सुट्ट्यांचे नियोजन काहीसे गोंधळात पडण्याची शक्यता व्यक्त केली जात आहे.
नववर्षात महाशिवरात्र, रंगपंचमी, अक्षय तृतीया, घटस्थापना, दीपावली तसेच डॉ. बाबासाहेब आंबेडकर महापरिनिर्वाणदिन या महत्त्वाच्या सुट्ट्या रविवारी येत आहेत. त्यामुळे या सणांच्या निमित्ताने मिळणाऱ्या सलग सुट्ट्यांची अपेक्षा पूर्ण होणार नसल्याची चर्चा आहे, मात्र भाऊबीजेच्या दिवशी अतिरिक्त सुट्टी जाहीर करण्यात आल्याने नोकरदारवर्गाला काहीसा दिलासा मिळाला आहे. ११ नोव्हेंबर २०२६ रोजी भाऊबीजेची अतिरिक्त सार्वजनिक सुट्टी असणार आहे. याशिवाय १ एप्रिल २०२६ हा दिवस केवळ बँकांसाठी वार्षिक लेखापरीक्षणाच्या कारणास्तव सुट्टी म्हणून जाहीर करण्यात आला आहे. त्यामुळे त्या दिवशी बँकांचे व्यवहार बंद राहणार आहेत. महाराष्ट्र शासनाच्या २०२६ रोजीतील सार्वजनिक सुट्ट्यांमध्ये प्रजासत्ताकदिन (२६ जानेवारी), छत्रपती शिवाजी महाराज जयंती (१९ फेब्रुवारी), धुलिवंदन (३ मार्च), डॉ. बाबासाहेब आंबेडकर जयंती (१४ एप्रिल), स्वातंत्र्यदिन (१५ ऑगस्ट), दिवाळी पाडवा (१० नोव्हेंबर), भाऊबीज (११ नोव्हेंबर), गुरू नानक जयंती (२४ नोव्हेंबर) आणि नाताळ (२५ डिसेंबर) यांसारख्या महत्त्वाच्या सुट्ट्यांचा समावेश आहे. दरम्यान, नववर्षात एकूण ४६ विवाह मुहूर्त उपलब्ध असल्याने लग्नसमारंभ, सामाजिक कार्यक्रम आणि संबंधित व्यवसायांना चांगली चालना मिळणार असल्याचे चित्र आहे.
..............
नववर्षातील विवाह मुहूर्तांच्या तारखा
१) जानेवारी : एकही विवाह मुहूर्त नाही.
२) फेब्रुवारी : ३, ५, ६, ७, ८, १०, ११, २०, २५, २६
३) मार्च : ५, ७, ८, १२, १४, १५, १६
४) एप्रिल : २१, २६, २८, २९, ३०
५) मे : १, ३, ६, ७, ८, ९, १०, १३, १४