रस्‍त्‍याच्या संथगती कामामुळे रहदारीला अडथळा

रस्‍त्‍याच्या संथ गती कामामुळे रहदारीला अडथळा
कांदिवली पश्चिमेतील म्हाडा वसाहत परिसरात रहिवाशांची गैरसोय
कांदिवली, ता. १६ (बातमीदार) ः कांदिवली पश्चिमेतील एकता नगर म्हाडा वसाहतीमधील श्याम सत्संग मुख्य मार्गाचे काँक्रीटीकरणाचे काम सुरू आहे. गेल्‍या दोन महिन्यांपासून संथ गतीने काम सुरू असल्‍याने रहदारीला अडथळा होत आहे.
स्थानिकांसह प्रवासी आणि वाहनचालकांना, माती, खडी, लोखंडी रॉड आणि धुळीचा नाहक त्रास सहन करावा लागत आहे. संबंधित पालिका अधिकाऱ्यांनी लक्ष देऊन लवकरात लवकर काम पूर्ण करावे, अशी मागणी स्‍थानिकांनी केली आहे.
म्हाडा वसाहतीमधील मुख्य मार्ग हा कमी अंतराचा असल्याने या मार्गावर प्रचंड वाहतूक असते. सध्या या मार्गाचे काँक्रीटीकरण सुरू आहे. अर्धे काम करून तसेच थांबवण्यात आले होते. दोन महिन्यांपासून उरलेल्या मार्गाचे काँक्रीटीकरण सुरू आहे, मात्र कामात सुसूत्रता नसल्याने, तसेच काम धीम्या गतीने सुरू असल्याने वाहतुकीस अनेक समस्या निर्माण होत असल्‍याचे वाहनचालकांनी सांगितले.
ठेकेदाराच्या कर्मचाऱ्यांकडून इतरत्र ठेवण्यात येणारे साहित्य, माती, लोखंडी रॉड तसेच सूचना फलक न लावता बंद करण्यात येणारी वाहतूक यामुळे प्रवाशांना आणि वाहनचालकांना प्रचंड मानसिक त्रास सहन करावा लागत आहे. दुचाकीला मार्ग खुला केला जातो, मात्र चुकीच्या पद्धतीने लावलेल्या लोखंडी बॅरिकेडमुळे तारेवरची जीवघेणी कसरत करत मार्गक्रमण करावे लागत आहे. वाहतुकीचा खोळंबा झाला असून, स्थानिकांना घराबाहेर पडणे जिकिरीचे झाले आहे. नियोजनाअभावी आमच्या व्यवसायावर परिणाम झाल्‍याचे व्यावसायिकांनी सांगितले. पालिकेचे अभियंता स्वप्नील जोशी यांच्याशी संपर्क साधला असता होऊ शकला नाही.

या समस्‍यांचा सामना
धुळीचा प्रचंड त्रास, खोदकाम केल्याने रस्त्यातील उंच सखलपणा, रस्त्यावर इतरत्र टाकण्यात येणारे साहित्य, सूचनाफलक न लावणे, सुरक्षेच्या उपाययोजनांचा अभाव यामुळे येथून प्रवास करणे अवघड झाले आहे.

दुचाकीस्‍वारांची तारेवरची कसरत
साहित्य इतरत्र टाकण्यात आले आहे. प्रचंड धूळ आणि व्यवस्थापनाचा अभाव यामुळे चारचाकी वाहनांना मार्ग बंद आहे. दुचाकीस्वारांना तारेवरची कसरत करावी लागते. पालिका अधिकाऱ्यांनी जातीने लक्ष घालून दिलासा द्यावा, अशी मागणी दुचाकीस्वार स्वप्नील कैले यांनी दिली.