पावणे चार लाखांचे दागिने हिसकावले

संगीत कार्यक्रमाहून परतणाऱ्या आजींचे दागिने लुटले
पावणेचार लाखांचा ऐवज लंपास
ठाणे, ता. १६ : मुंबईतील संगीत कार्यक्रम आटोपून पतीसोबत घरी परतणाऱ्या एका ६९ वर्षीय महिलेच्या गळ्यातील सोन्याचे दागिने दुचाकीस्वार चोरट्यांनी हिसकावल्याची धक्कादायक घटना घडली आहे. माजिवडा-मानपाडा प्रभाग समिती कार्यालयासमोर रविवारी (ता. १४) रात्री साडेअकराच्या सुमारास ही घटना घडली. याप्रकरणी कापूरबावडी पोलिस ठाण्यात गुन्हा दाखल करण्यात आला आहे.

घोडबंदर रोडवरील आर मॉल परिसरात राहणाऱ्या गौमती अनंत नारायण (६९) रविवारी पतीसोबत माटुंगा येथे एका संगीत कार्यक्रमासाठी गेल्या होत्या. कार्यक्रम संपवून त्या रात्री सव्वा अकराच्या सुमारास सायन- बदलापूर बेस्ट बसने ठाण्यातील यशस्वीनगर बसथांब्यावर उतरल्या. तेथून पायी चालत जात असताना, ढोकाळी रोडवरील रिक्षा स्टँडजवळ दुचाकीवरून आलेल्या दोन अज्ञात चोरट्यांनी त्यांच्यावर झडप घातली.

दुचाकीवर मागे बसलेल्या चोरट्याने गौमती यांच्या गळ्यातील दोन लाखांची सोन्याची साखळी आणि एक लाख ७५ हजारांचे मंगळसूत्र असा एकूण तीन लाख ७५ हजार रुपयांचा ऐवज जबरदस्तीने खेचला आणि वेगाने पोबारा केला. परिसरात उपस्थित असलेल्या एका व्यक्तीने आपल्या दुचाकीवरून चोरट्यांचा पाठलाग करण्याचा प्रयत्न केला; मात्र अंधाराचा फायदा घेत चोरटे पसार झाले.

पोलिस तपास सुरू
घटनेनंतर परिसरात भीतीचे वातावरण असून, ज्येष्ठ नागरिकांच्या सुरक्षिततेचा प्रश्न पुन्हा ऐरणीवर आला आहे. कापूरबावडी पोलिस ठाण्याच्या वरिष्ठ पोलिस निरीक्षक मंजुषा भोंगळे यांच्या मार्गदर्शनाखाली पोलिसांनी परिसरातील सीसीटीव्ही फुटेज तपासण्यास सुरुवात केली असून चोरट्यांचा शोध घेतला जात आहे.