रस्त्यालगत कोका कोला कंपनीच्या जल वाहिनीचे काम सूरू

कोकाकोला कंपनीच्या जलवाहिनीचे काम सुरू
सार्वजनिक बांधकाम विभागाचे दुर्लक्ष ः काँग्रेसची कारवाईची मागणी
वाडा, ता.१६ (बातमीदार) ःतालुक्यातील कुडूस येथे कोकाकोला ही शीतपेय बनवणारी कंपनी असून ही गांध्रे येथील वैतरणा नदीवरील बंधांऱ्यातून पाणी उचलते. या कंपनीने काही वर्षापूर्वी भिवंडी-वाडा रस्त्यालगत जलवाहिनी टाकली असून तेथून लाखो लिटर पाण्याचा उपसा केला जातो. आता भिवंडी-वाडा रस्त्याच्या सिमेंट काॅंक्रीटीकरणचे काम सुरू असल्याने काही ठिकाणी पाण्याची वाहिनी तुटलेली आहे. त्यामुळे नवीन जल वाहिनी टाकण्याचे काम सुरू केले असून हे काम रस्त्यालगतच घेतल्याने यावर काँग्रेस पक्षाने आक्षेप नोंदवत नियमबाह्य काम करणाऱ्यांवर कारवाईची मागणी केली आहे.
कोकाकोला कंपनी उत्पादनासाठी गांध्रे गावच्या हद्दीतील बंधांऱ्यातून मोठ्या प्रमाणात पाण्याचा उपसा करते. भिवंडी-वाडा रस्त्याच्या सिमेंट काँक्रिटीकरणाचे काम सुरू असताना कंपनीची जुनी जलवाहिनी तुटल्यामुळे नवीन जलवाहिनी टाकण्याचे काम सुरू झाले आहे. मात्र, नियमानुसार रस्त्याच्या मध्यापासून १५ मीटर अंतरावर जलवाहिनी किंवा इतर वाहिन्या टाकण्याचा नियम असताना, कंपनीने सर्व नियम धाब्यावर बसवून रस्त्यालगतच खोदकाम सुरू केले आहे. यावर काँग्रेसने आक्षेप घेतला असून काम तातडीने बंद करण्याची मागणी केली करत कायदेशीर कारवाईचा इशारा दिला आहे .

यासंदर्भात पालघर सार्वजनिक बांधकाम विभागाचे शाखा अभियंता अजय जाधव यांच्याशी संपर्क साधला असता कोकाकोला कंपनीच्या नवीन जल वाहिनीसाठी पाटबंधारे विभागाकडे प्रकरण गेले असून सद्यस्थितीत सुरू असलेले काम हे जुन्या जल वाहिनीचे आहे. काही ठिकाणी रस्त्याच्या कामात तुटलेली जल वाहिनी दुरूस्त करायला घेतल्याची माहिती त्यांनी दिली आहे.

कोकाकोला कंपनीने जल वाहिनीसाठी रस्त्यावरच खोदकाम सुरू केले आहे. कंपनीने हे सर्व नियम धाब्यावर बसवून रस्त्यालगत खोदकाम सुरू केले आहे. आमचा याला विरोध असून काम करणाऱ्या कर्मचारी व अधिकारी यांच्यावर फौजदारी गुन्हे दाखल करावेत, अशी मागणी आहे. यासंदर्भात लवकरच जिल्हाधिकाऱ्यांना भेटणार आहोत.
प्रफुल पाटील, जिल्हाध्यक्ष, काँग्रेस