वैद्यकीय शिक्षणात कौशल्याधारित प्रशिक्षणाला नवी दिशा

वैद्यकीय शिक्षणाला नवी दिशा
केईएम रुग्णालयात अत्याधुनिक यूजी-पीजी स्किल लॅब

सकाळ वृत्तसेवा
मुंबई, ता. १६ : मुंबई महानगरपालिकेचे सेठ जी. एस. वैद्यकीय महाविद्यालय आणि केईएम रुग्णालयात वैद्यकीय शिक्षण अधिक प्रभावी व कौशल्यकेंद्री करण्याच्या दृष्टीने अत्याधुनिक यूजी-पीजी स्किल लॅब सुरू करण्यात आली. या लॅबचा फायदा वैद्यकीय विद्यार्थ्यांना होणार आहे.
लॅबचे उद्घाटन अधिष्ठात्री डॉ. संगीता रावत यांच्या हस्ते करण्यात आले. या वेळी अधिष्ठाता (शैक्षणिक) डॉ. हरिश पाठक, वैद्यकीय अधीक्षक डॉ. मोहन देसाई, भूलशास्त्र विभागप्रमुख डॉ. अमला कुडलकर तसेच विविध विभागांचे वरिष्ठ प्राध्यापक व शिक्षक उपस्थित होते.
नव्या यूजी-पीजी स्किल लॅबमुळे केईएम रुग्णालय व सेठ जी. एस. मेडिकल कॉलेजचे वैद्यकीय शिक्षणातील अग्रस्थान अधिक भक्कम होणार असून, प्रशिक्षित व कुशल डॉक्टर घडविण्यास ही सुविधा महत्त्वाची ठरणार आहे. वैद्यकीय विद्यार्थ्यांना ही सुविधा देण्यासाठी मुंबई महानगरपालिकेचे पाठबळ असल्याचे केईएम प्रशासनाने स्पष्ट केले.

रुग्णसेवेची गुणवत्ता सुधारण्यास मदत

नव्या स्किल लॅबमुळे पदवीपूर्व (यूजी) आणि पदव्युत्तर (पीजी) वैद्यकीय विद्यार्थ्यांना प्रत्यक्ष रुग्णांवर उपचार करण्यापूर्वी आवश्यक कौशल्यांचा सराव सुरक्षित वातावरणात करता येणार आहे. लॅबमध्ये विविध वैद्यकीय प्रक्रियांसाठी आवश्यक मॅनिकिन्स, सिम्युलेशन मॉडेल्स आणि प्रशिक्षण उपकरणे उपलब्ध करून देण्यात आली आहेत. त्यामुळे विद्यार्थ्यांच्या आत्मविश्वासात वाढ होऊन रुग्णसेवेची गुणवत्ता अधिक सुधारण्यास मदत होणार आहे.

सुमारे ४०० विद्यार्थ्यांना फायदा

दरवर्षी सुमारे २५० पदवीपूर्व आणि १५० पदव्युत्तर विद्यार्थ्यांना या स्किल लॅबचा थेट लाभ मिळणार आहे. विशेषतः आपत्कालीन उपचार, भूलशास्त्र, शस्त्रक्रिया, जीवनरक्षक प्रक्रिया तसेच क्लिनिकल कौशल्यांचे प्रशिक्षण येथे देता येणार असून, रुग्णांच्या सुरक्षिततेस प्राधान्य देत ‘लर्न बाय डुईंग’ संकल्पना प्रत्यक्षात उतरवली जाणार आहे. नवीन राष्ट्रीय वैद्यकीय शिक्षण धोरणांनुसार कौशल्यधारित शिक्षणाची आवश्यकता असून, ही लॅब त्या दिशेने महत्त्वाचे पाऊल आहे'' असे मत अधिष्ठाता (शैक्षणिक) डॉ. हरिश पाठक यांनी या वेळी व्यक्त केले.

वैद्यकीय शिक्षणात केवळ सैद्धांतिक ज्ञान नव्हेतर प्रत्यक्ष कौशल्य आत्मसात करणे अत्यंत महत्त्वाचे असून, नेमके त्याचकरिता ही स्किल लॅब विद्यार्थ्यांसाठी महत्त्वपूर्ण प्रशिक्षण देणारे व्यासपीठ ठरणार आहे.
- डॉ. संगीता रावत, अधिष्ठात्री, केईएम रुग्णालय