सार्वजनिक स्वच्छतागृहाची अखेर सफाई

सार्वजनिक स्वच्छतागृहाची अखेर सफाई
‘सकाळ’च्या बातमीचा परिणाम; महिलांनी मानले आभार
खालापूर, ता. १६ (बातमीदार) ः तालुक्याच्या ठिकाणी असलेल्या सार्वजनिक स्वच्छतागृहाच्या दुरवस्थेबाबतचे वृत्त दैनिक ‘सकाळ’मध्ये प्रसिद्ध होताच खालापूर नगर पंचायतीने त्याची तातडीने दखल घेत सफाई मोहीम हाती घेतली. नगर पंचायतीच्या सफाई कर्मचाऱ्यांकडून स्वच्छतागृहासह संपूर्ण परिसराची स्वच्छता करून ते पुन्हा वापरयोग्य करण्यात आले आहे.
तालुक्याच्या ठिकाणी कामानिमित्त येणाऱ्या नागरिकांसाठी, विशेषतः महिलांसाठी, स्वच्छतागृहाची मोठी गरज लक्षात घेऊन सुमारे सहा वर्षांपूर्वी तत्कालीन नगराध्यक्षा शिवानी जंगम यांनी सार्वजनिक स्वच्छतागृह उभारण्यासाठी पुढाकार घेतला होता. या स्वच्छतागृहामुळे नागरिकांची मोठी गैरसोय दूर झाली होती. विशेष म्हणजे, ही सेवा पूर्णतः निःशुल्क असल्याने नागरिकांकडून त्या वेळी या उपक्रमाचे कौतुकही करण्यात आले होते; मात्र गेल्या काही महिन्यांपासून स्वच्छतागृहाची नियमित सफाई होत नसल्याने अस्वच्छतेमुळे नाराजी पसरली होती. दुर्गंधी, साचलेले पाणी आणि कचऱ्यामुळे नागरिकांना स्वच्छतागृहाचा वापर करणे कठीण झाले होते. याबाबत प्रसारमाध्यमांतून वृत्त प्रसिद्ध झाल्यानंतर नगर पंचायतीने तत्काळ पावले उचलली. खालापूर नगर पंचायतीचे उपनगराध्यक्ष संतोष जंगम यांनी या बातमीची गंभीर दखल घेत सफाई कर्मचाऱ्यांना तातडीने कार्यवाही करण्याच्या सूचना दिल्या. त्यांच्या मार्गदर्शनाखाली स्वच्छतागृहातील आतील भागासह परिसराची स्वच्छता करण्यात आली. या कारवाईमुळे नागरिकांनी समाधान व्यक्त केले असून, यापुढे स्वच्छतागृहाची नियमित देखभाल व स्वच्छता राखण्याची मागणी केली जात आहे.