सीएसएमटीतील पालिकेचे कान-नाक-घसा रुग्णालय होणार अत्याधुनिक

सीएसएमटीतील पालिकेचे कान- नाक- घसा रुग्णालय होणार अत्याधुनिक
इमारतीचे वारसास्थळ वैभव जपत बांधकाम, संपूर्ण कामासाठी ३६ महिन्यांची मुदत
सकाळ वृत्तसेवा
मुंबई, ता. १६ ः मुंबई महापालिकेच्या अखत्यारित येणाऱ्या सीएसएमटी फोर्ट परिसरातील ईएनटी म्हणजेच कान- नाक- घसा रुग्णालयाच्या इमारतीचे दुरुस्ती बांधकाम सुरू झाले असून हे रुग्णालय अत्याधुनिक होणार आहे. नव्या बांधकामामुळे रुग्णालयातील सेवा-सुविधांमध्ये लक्षणीय वाढ होणार आहे.
महात्मा गांधी रोड आणि महर्षि दधिची मार्ग स्थित ही इमारत हेरिटेज श्रेणी २ अंतर्गत येत असल्याने इमारतीच्या दुरुस्तीसाठी हेरिटेज विभागाची आवश्यक मंजुरी महापालिकेला मिळाली आहे. इमारत वारसास्थळ असल्याने तिचे संरचनात्मक जतन आणि मूळ स्वरूपातील वैभव पुन्हा प्राप्त करणे गरजेचे असल्याचे महापालिकेच्या अधिकाऱ्यांनी सांगितले. दोन मजली या इमारतीचे बांधकाम करताना तिच्या वास्तुशैलीचे जतन राखत आवश्यक दुरुस्ती करण्यावर विशेष भर देण्यात येत आहे.
दुरुस्तीचे काम तीन टप्प्यांत करण्यात येणार आहे. पहिल्या टप्प्यात इमारतीच्या आतील-बाहेरील भागातील लाकडी काम, छतावरील लाकडी संरचनात्मक दुरुस्ती आणि भिंतींची कामे केली जात आहेत. या प्रारंभीच्या टप्प्यानंतर इमारतीचे मूलभूत स्थैर्य आणि सुरक्षितता सुनिश्चित करण्याचा प्रयत्न केला जात असून या दोन्ही टप्प्यांतील काम पूर्ण करण्यात आले आहे.
दुसऱ्या टप्प्यात इमारतीच्या बाहेरील भागाचे बांधकाम, कर्मचाऱ्यांच्या गरजेनुसार अंतर्गत जागेचा पुनर्निर्माण व नूतनीकरण, पाणी जोडणी, विद्युतीकरण, वैद्यकीय गॅस पाइपलाइन आणि एलपीजी लाइन बसवण्याची कामे हाती घेतली जाणार आहेत. या बदलांमुळे रुग्णालयातील कार्यप्रणाली अधिक कार्यक्षम होण्याची अपेक्षा आहे. तिसऱ्या टप्प्यात टेरेसवरील टॉवरचे आंतरिक आणि बाह्य जीआरसी काम, पावसापासून संरक्षण, फॉल्स सीलिंग, पार्किंग सुविधा आणि अग्निसुरक्षा प्रणालींची उभारणी करण्यात येणार आहे. मजल्यांवर दिशादर्शक फलकांची स्थापना केली जाईल.

३६ महिन्यांची मुदत
ठेकेदाराला संपूर्ण काम ३६ महिन्यांत पूर्ण करणे बंधनकारक असून पुढील ६० महिने देखभाल आणि पावसाळ्यातील गळती रोखण्याची जबाबदारीही त्याच्याकडेच राहणार आहे. या संपूर्ण कामासाठी महापालिका दोन कोटी ४२ लाख २० हजार रुपये खर्च करत आहे. यात दुरुस्ती, नूतनीकरण आणि आधुनिकीकरण केले जाईल. मे. हाय-टेक इंजिनिअर्स या कंत्राटदाराला या इमारतीच्या बांधकामाचे काम देण्यात आले आहे. या इमारतीच्या दुरुस्तीनंतर रुग्णांना अत्याधुनिक सुविधा उपलब्ध होतील, अशी ग्वाही पालिकेच्या अधिकाऱ्यांनी दिली.