मतदार याद्यांवरून कुरकुर

मतदार याद्यांवरून कुरकुर
सावळा गोंधळ कायम असल्याने नाराजी
भाईंदर, ता. १६ (बातमीदार): मिरा-भाईंदर महापालिकेच्या प्रसिद्ध झालेल्या अंतिम मतदार याद्यांमध्ये राजकीय पक्षांनी नोंदवलेल्या हरकतीनंतर त्यांची पडताळाणी होऊन याद्यांमधील दोष दुरुस्त होतील, अशी अपेक्षा होती, मात्र प्रत्यक्षात याद्यांमधील गोंधळ कायम असल्याने तक्रारी वाढल्या आहेत.
प्रारूप मतदार याद्यांमध्ये मोठा गोंधळ होता. एका प्रभागातील हजारो नावे दुसऱ्या प्रभागात नोंदवली गेली आहेत. लगतच्या प्रभागातील इमारतींची नावे दुसऱ्या प्रमागात समाविष्ट असल्याने राजकीय पक्षांकडून आक्षेप घेण्यात आले होते. प्रारूप याद्यांवर ७४० हरकती नोंदवण्यात आल्या होत्या. या सर्व हरकतींची पडताळणी करण्यासाठी आयुक्त राधाबिनोद शर्मा यांनी प्रभागानुसार पथके नेमली होती. तसेच स्वतः तक्रारींची शहानिशा केली होती, मात्र याद्यांमधील घोळ कायम असल्याने राजकीय पक्षांमध्ये नाराजीचा सूर आहे.
-----------------------
नोंदवलेले आक्षेप
- मिरा रोडमध्ये प्रभाग १९ मध्ये प्रारूप याद्यांवरील आक्षेपांचे काही प्रमाणात निराकारण झाले आहेत, मात्र अंतिम मतदार यादीमध्ये चार हजार मतदार वाढले आहेत. हे मतदार दुसऱ्याच प्रभागातील आहेत, अशी माहिती काँग्रेसचे माजी नगरसेवक राजीव मेहरा यांनी दिली.
- उत्तन भागातील एका यादीत १० नावे असून, त्यातील १,२०० नावे भाईंदर पूर्व येथील जेसल पार्क प्रभागात समाविष्ट करण्यात आली आहेत, मात्र अंतिम मतदार यादीत ही नावे आता भाईंदर पूर्व भागात गेल्याचा आक्षेप शिवसेनेचे नेते बर्नड डिमेलो यांनी नोंदवला आहे.
- भाईंदर पूर्व भागातही प्रभाग तीनमध्ये प्रभाग दोन, चार व ११ मधील इमारतींचा समावेश झाला आहे, तर प्रभाग ११ मध्ये प्रभाग चार व प्रभाग १० मधील इमारती आल्या असल्याचे माजी नगरसेवक दिनेश नलावडे, माजी उपमहापौर प्रवीण पाटील यांनी सांगितले.
़़़़़़़़़़़़़़़़़़़़़़-----------------------
प्रारूप मतदार याद्यांवर आलेल्या सर्व हरकतींची पडताळणी करून त्याचे निराकारण करण्यात आले आहे. महापालिका कर्मचाऱ्यांनी दिवसरात्र हे काम केले आहे. त्यानंतरही यादीवर काही आक्षेप असतील, तर त्या ऐकून घेण्यात येतील, मात्र मतदार याद्या अंतिम झाल्या आहेत.
- राधाबिनोद शर्मा, आयुक्त, मिरा-भाईंदर पालिका